Стамбулдун мэринин кармалышы жана акциялар. Түркияда түн кандай өттү
© AP Photo / Rafiq Maqbool
Жазылуу
БИШКЕК, 23-мар. — Sputnik. Оппозиция төрт күндөн бери "көчө террорчулугу" жана элди бөлүп-жаруу менен алек. Мындай пикирин Түркия президенти Режеп Тайип Эрдоган Стамбулдун мэри Экрем Имамоглу кармалгандан кийин аны колдоп чыккандардын каршылык акциясына карата комментарий бергенде айтканын РИА Новости жазды.
Түркиянын башчысы “бийликке басым жасоо” жана “саясатты көчөгө чыгып аныктоо” артта калган ыкма экенин билдирген.
"Улуттук эркиндикке сөөмөй кезеп, артынан топторду, вандалдарды ээрчитип көчөгө чыгуу артта калганын дагы бир жолу эске салгым келет. Саясаттын багыты жана адилеттүүлүк көчө террорчулугу аркылуу чечиле турган күндөр мурдагы эски Түркия сыяктуу эле өткөн күндөрдө калган", – деген Эрдоган.
Имамоглу 2028-жылы боло турган президенттик шайлоодо Эрдогандын негизги атаандашы болуп саналат.
Өткөн түндө Түркияда болгон окуялардын урунттуу учурлары:
Полиция Стамбулдун Сарачхане паркына митингге чогулгандарды кууп чыга баштаган. Ал эми топтолгондор полиция кызматкерлерине бөтөлкөлөрдү ыргытып, фейерверктерди аттырышкан. Күч органдарынын кызматкерлери буга жооп иретинде көздөн жаш чыгарган газды колдонушкан.
Анкара шаарында да Стамбулдун мэрин колдогондор топтолгон. Аларга карата полиция суу чачыраткычтар менен көздү ачыштырган каражаттарды колдонушкан (видеодо).
Ишембиде каршылык акциясынан кийин 300дөн ашык адам кармалган, полиция кызматкерлеринин бирине кислота куюп жиберишкен.
Түркиянын прокуратурасы соттон Стамбулдун мэри Имамоглуну террорчулук жана коррупцияга айыптап камакка алууну өтүнгөн.
Стамбул мэринин иши же нааразылыктын башы
Эл колдоп чыккан Стамбул мэри Экрем Имамоглуну 19-мартта ири коррупцияны, паракорлукту уюштурган деп кармашкан. Ал бийликтин бул кысымына багынбастыгын айткан.
Ал арада Стамбул университети Имамоглунун дипломун жокко чыгарууну чечти. Башкы прокуратура Имамоглу Түндүк Кипрдеги университеттен Стамбулга которулушунда мыйзам бузуулар болушу мүмкүн экенин боолголоодо. Себеби Түркия ал кезде бул окуу жайды расмий тааныган эмес. Мэр бул боюнча көрсөтмө берген.
Дипломдун жокко чыгарылышы Имамоглунун президенттикке талапкер болушуна тоскоолдук жаратат, анткени Түркиянын Конституциясына ылайык, жогорку билими барлар гана мамлекет башчылыкка ат салышууга укуктуу. Имамоглу учурда оппозициялык партиядан праймеризге катышкан жалгыз талапкер жана Эрдогандын негизги атаандашы катары эсептелет.
Президент Эрдоган оппозицияны полицияга жана сот системасына саясий кысым көрсөтүүгө аракет кылды деп айыптап, өкмөт мамлекеттик маселелерди чечүү менен алек болгондуктан талаш-тартышка убакыт жок экенин билдирди.
