Тарыхый-маданий мурас объектилерин 49 жылга ижарага берүү сунушталууда
Жазылуу
БИШКЕК, 17-мар. — Sputnik. Өлкөдө тарыхый-маданий мурас деп эсептелген объектилерди 49 жылга чейин ижарага берүү сунушталууда. Тиешелүү мыйзам долбоорун Маданият, маалымат жана жаштар саясаты министрлиги иштеп чыккан.
Коомдук талкууга чыгарылган документке ылайык, ижарага археологиялык эстеликтер жана эл аралык маанидеги объектилерден башкасын берүү каралган.
Мыйзам долбоорундагы негизги учурлар:
тарых жана маданият эстеликтеринин тизмеси атайын экспертизанын негизинде министрлер кабинети тарабынан, аймактык маанидегилердики жергиликтүү бийликтин чечими менен бекитилет. Аларды бузуу же өзгөртүү боюнча чечимди дагы ушулар кабыл алат;
мамлекеттик тарыхый-маданий экспертиза (курамына окумуштуулар кирет) айрым эстеликтерге "жараксыз" деген белгини коё алат. Белги кандайдыр бир кырсыктан же башка себептен имарат же объект жараксыз болгондо коюлат;
тарыхый-маданий мурас объектилери ишкерлерге 15 жылга (азыр 5 жыл), мамлекеттик-жеке өнөктөштүктүн алкагында болсо 49 жылга чейин ижарага берилиши ыктымал. Ишкерлер аны коргоо жана пайдаланууга милдеттеме алат. Түшкөн каражат эстеликтерди сактоого, коргоого, реставрациялоого жана пайдаланууга багытталат;
тарыхый-маданий мурас объектилери үчүн коргоо зоналары түзүлүп, алардын долбоорлору мамлекеттик орган тарабынан, ал эми эл аралык маанидеги объектилер үчүн министрлер кабинети тарабынан бекитилет;
тарыхый-маданий экспертиза жүргүзүү үчүн маданият, археология, архитектура жана реставрация тармагындагы адистерден турган эксперттик комиссия түзүлөт;
археологиялык иштерге изилдөөлөрдү жүргүзүүгө берилген уруксат кагаз берүү тартиби министрлер кабинети тарабынан бекитилет. Уруксат Кыргызстандын жарандарына, мамлекеттик же муниципалдык илим жана маданият мекемелеринде иштегендерге гана берилет.
13 Бештин айы 2024, 09:43
