Жумалиев: Бишкекте айлана-чөйрөнү тазалаган бактар отургузулууда
© Sputnik / Арууке Амирдинова
Жазылуу
"Бишкек жашыл курулуш" муниципалдык ишканасынын маркетинг, сатуу жана инвестицияларды тартуу бөлүмүнүн башчысы Жаныбек Жумалиев республика боюнча 15 миң түп бак отургузуу пландалып жатканын айтты.
Быйыл баш калааны көрктөндүрүү үчүн 625 миллион сомдун тегерегинде акча каражаты бөлүндү. Бул тууралуу Жаныбек Жумалиев Sputnik Кыргызстан радиосунун эфиринде маек куруп жатып билдирди.
Жумалиев: Бишкекте айлана-чөйрөнү тазалаган бактар отургузулууда
Анын айтымында, учурда шаардын төрт районунда эки миң түп дарак отургузулуп жатат.
"Бишкек жашыл курулуш" муниципалдык ишканасына шаардагы 832 гектар жерде өскөн бак-дарактарга, жашыл аймактарга кам көрүү, көчөт отургузуу жана гүлдөрдү сугаруу, кайтаруу милдеттери жүктөлгөн. Быйыл эң башкы планыбыз — республика боюнча 15 миң түп бак отургузуу. Баш калааны көрктөндүрүү үчүн жазгы ийне жалбырактуу бак-дарактар жана бадалдар тигилүүдө. Ийне жылбырактууларды отургузуунун өзүнүн технологиясы бар. Аны январь-февраль айларында тигүү керек. Бүгүнкү күндө, планга ылайык, шаардын төрт районунда эки миң түп бак отургузулуп жатат. Калган сегиз миңи күндүн табына ылайыктап тигилет. Мындан тышкары, шаарда карыган бактар кыйылып, ордуна абаны тазалай тургандары отургузулуп жатат. Ошондой эле шаарыбыздын көркүн чыгарган түрдүү гүлдөрдү тигүү, урук себүү да ишкананын милдети. Апрелде гүлүн ача турган жоогазын гүлдөрү былтыр декабрь айында отургузулган. Жалпы 190 миң даана жоогазын төрт райондун эң негизги бөлүктөрүнө тигилди. Тилекке каршы, жоогазын аз убакытка гана гүлдөйт. Ошондуктан анын ордуна кайрадан бир жылдык гүлдөр отургузулат. 2024-жылы жалпы 1 миллион 400 гүл отургузулса, быйыл алардын саны АТРдин негизинде 1 миллион 600гө көбөйтүлдү", — деди Жумалиев.
Ал ошондой эле жаңы конуштарга суу тамчылатып сугаруу системасы менен жеткириле баштаганын кошумчалады.
