Мамытов: франшиза — акчалуулардын бизнеси, талап күчтүү
© Sputnik / Арууке Амирдинова
Жазылуу
Мамлекеттик башкаруу академиясынын жаңы экономика боюнча илим-изилдөө кафедрасынын жетекчиси, экономист Улукман Мамытов франшиза бизнесин ачууда эмнелерге көңүл буруу зарылдыгын айтты.
Франшиза бизнеси өлкө экономикасы үчүн ачык иштегени менен пайдалуу. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Анын айтымында, Кыргызстан сыяктуу чакан өлкөлөр үчүн франшизалык бизнестин экономикага таасири деле жок.
"Франшиза бизнеси — жөнөкөй тил менен айтканда, бирөөнүн брендин колдонуп ишкерлик кылуу. Бул жерде талапты да ошол бренд ээси коет. Мисалы, ал мейманкана болсо андагы жасалганын өңү-түсү эле эмес, ашканадагы ар бир кашыкка чейин кандай болушун бренд ээси бекитет. Керек болсо тейлөөдөгү мамиле, франшиза ээсинин жүрүм-туруму, ал бош кезде эмне менен алектениши зарылдыгына чейин көрсөтүлөт. Мындай талаптарга ар бир эле бизнесмен чыдай бербейт. Анан калса аны аткарууга да ири каражат талап кылынат. Ал эми ийкемдүү жактарын атай турган болсок, бул өзүң ачкан бизнеске караганда банкрот болуу коркунучу азыраак, тобокелчиликтерге барбай даяр схема менен иштөө мүмкүнчүлүгү бар. Дүйнөдө франшиза ачып, ал негизги компаниядан да ийгиликтүү болуп, бренддин өзүн сатып алып койгон учурлар да бар. Ал эми мамлекет үчүн жакшы жагы — алар ачык иштешет, көмүскө экономика буларда жок. Жергиликтүү ишкерлер үчүн терс жагы — эгер кимдир бирөө ошол сыяктуу бизнес ачуу кыялында жүргөн болсо франшизанын келиши менен ал үчүн рынок жабылып калышы ыктымал", — деди Мамытов.
Ал франшиза бизнеси жалаң гана өзү койгон эрежелер эмес, жергиликтүү рынокко ылайыкташкан ийкемдүүлүктү да жакшы өздөштүргөнүн кошумчалады.
