Кош бойлуу кезде туура тамактануунун жолдорун дарыгерлер айтып беришти
© Photo / Unsplash / Anastasiia Chepinska
Жазылуу
Адистердин айтымында, боюнда бар аялдын 11-15 килограмм салмак кошуусу кадыресе көрүнүш.
БИШКЕК, 12-авг. — Sputnik. Кош бойлуу эненин тамактануусу баланын түйүлдүк кезинен тарта эки жашка чейинки убагында абдан маанилүү. Анда наристенин ден соолугу, акылы, өрчүшү аялдын жеген тамагына жараша болот. Бул тууралуу Республикалык ден соолукту чыңдоо жана массалык коммуникация борборунан билдиришти.
"Аял кош кат кезде организмде суунун көлөмү көбөйөт. Мындан улам кандын көлөмү өсүп, түйүлдүктү кислород жана башка керектүү азыктар менен камсыз кылып турган эритроциттер көбүрөөк бөлүнө баштайт. Кан суюлуп, гемоглобин түшөт. Ошондуктан кандагы темирди, гемоглобинди көтөрүп туруу зарыл", — деп эскертишти адистер.
Дарыгерлер кош бойлуу келиндерге туура тамактанууда төмөнкү азыктарды колдонууга чакырган:
күрүч, нан, дан азыктары энеге энергия берип, баланын өсүшүнө жардам берет. Алар витамин, минерал жана темирге бай;
мөмө-жемиш, жашылчадан көптөгөн витамин алса болот. Өзгөчө А витаминине бай болгон жашыл, сары, саргыч түстөгү жашылчалар сунушталат;
карагат, болгар калемпири, цитрус жемиштери С витамининде кенен. Күнүнө 400 граммдан кем эмес жемиш, жашылча жеп туруу зарыл;
сүт, айран, быштак — кальций менен белоктун булагы. Булар бөбөктүн сөөгү жакшы өрчүшү үчүн керектелет. Күнүнө бир чөйчөк сүт же айран, же болбосо 30 грамм быштак жеп туруу сунушталат;
эт, балык, буурчак, жумуртка, жаңгак организмди белок менен камсыздайт. Күнүмдүк тамак-ашка бир жумуртка, 60-80 грамм малдын же тооктун этин колдонуу зарыл;
чайдын ордуна суу ичиңиз.
Кош бойлуу учурда 11-15 килограмм салмак кошуу нормалдуу көрүнүш.
