Жаңылыктар. Чыгарылыш 19:00

Жаңылыктар. Чыгарылыш 19:00
Жазылуу
Өкмөт массалык уулануу боюнча жыйын өткөрүп, тапшырмаларды бердиКыргызстанда туулуп-өскөн космонавттар Улуттук музейге барыштыАлимент толобогондорду 9 айга чейин эркинен ажыратуу сунушталды алдыда кененирээкКыргызстанда ар бир төртүнчү бала, тагыраагы, бөбөктөрдүн 23,3%ы толук эмес үй-бүлөдө төрөлүп жатат. Бул 2022-жылга карата алынган статистика экенин депутат Элдар Абакиров бүгүнкү ЖК комитетинин жыйынында билдирди. “Ажырашуу да көбөйүп кетиптир, 2018-жылы миң үй-бүлөгө 210 ажырашуу болсо, 2022-жылы 253 ажырашуу туура келген”, — деди эл өкүлү. Комитет ата-энелердин балдарына жана балдардын карыган ата-энелерине алимент төлөө милдети жөнүндө мыйзам долбоорун карап жатат. Демилгечилер алимент төлөбөгөн адам 60-100 сааттык коомдук жумушка тартылышын же 9 айга чейин эркинен ажыратылышын сунуштоодо.
Министрлер кабинети Бишкектеги ресторандардын бириндеги массалык ууланууга байланыштуу жыйын өткөрдү. Бул тууралуу өкмөттүн маалымат кызматынан билдиришти. Жыйында мындай окуялардын алдын алуу жана жарандардын ден соолугунун коопсуздугун камсыздоо маселелери талкууланган. Саламаттыкты сактоо министрлигине коомдук тамактануу тармагында санитардык-эпидемиологиялык жана тамак-аш коопсуздугунун эрежелерин бузгандыгы үчүн айыптын өлчөмүн жогорулатуу боюнча сунуштарды киргизүү тапшырылды. Ошондой эле Экономика жана коммерция министрлигине тамак-аш даярдоочу жайларда байкоочу камераларды милдеттүү түрдө орнотуу сунушун киргизүү милдеттендирилген. Белгилей кетсек, буга чейин Бишкектеги ресторандардын биринде эки той өтүп, анда ууланып ооруканага кайрылгандардын саны 39га жеткени кабарланган.
Автобустар алып келингенден кийин Бишкектеги маршруткалар кайда барат? Бул суроого вице-мэр Мирланбек Байгончоков ЖК комитетинде жооп берди. Анын айтымында, шаардагы маршруткалар акырындык менен автобустарга алмаштырылат. “Азыр административдик аймактык реформа жүрүп жатат, анын негизинде шаар 3 эсе чоңоет. Ошого байланыштуу шаардын борборундагы микроавтобустарды ошол жактарга (ред.: жаңы кошулган аймактарга) жиберебиз деп пландап жатабыз”, — деди вице-мэр.
Кыргызстанда туулуп-өскөн космонавттар Сергей Корсаков менен Салижан Шарипов космосту изилдөө боюнча көргөзмөгө барышты. Шарипов менен Корсаков көп жылдардан бери чогуу иштешет, бирок туулган жеринде биринчи жолу кездешишти. Аларга Гагариндин 90 жылдыгына арналган "Космос доорунун таңы" аталышындагы көргөзмөгө экскурсия уюштурулду. Ошондой эле Улуттук музейде космосту изилдөөгө Кыргызстандын кошкон салымы тууралуу көргөзмө ачуу пландалууда.
Кыргызстанда мамлекеттин колдоосу менен 144 бал челек чарбасы ачылган. Бул тууралуу эмгек, социалдык камсыздоо жана миграция министрлиги кабарлады. Министр Гүлнара Баатырова эки жылдын ичинде 144 үй-бүлө мамлекеттен 100 миң сомдон алып, балчылык менен ишкерлик кылганын, бизнес-идея өзүн актаганын белгилеген. Министр буга чейин мамлекеттин 100 миң сомдон акча алып күнөскана ачкан, ири мүйүздүү мал алып иш кылып жаткан аялдар менен жолуккан. Белгилей кетсек, быйыл мамлекет 20 миңдей үй-бүлө менен социалдык келишим түзүүнү көздөөдө. Андан тышкары, Дүйнөлүк банктын колдоосунда 3 миң үй-бүлө менен да ушундай эле келишим түзүлмөкчү.ЭМИ ВАЛЮТА КУРСУ МЕНЕН ТААНЫШЫП АЛЫҢЫЗДАР Улуттук банктын билдирүүсү боюнча ушул тапта: 1 АКШ доллары 89 сом 1 тыйынга 1 евро 94 сом 77 тыйынга 1 рубль 94 тыйынга Казак тенгеси 19 тыйынга барабар
МУНАЙ БААСЫ Бишкекте орточо эсеп менен алганда Аи 92 үлгүсүндөгү бензин 62 сом 50 тыйындан баштап, 63 сом 40 тыйынга чейин, Аи 95 үлгүсүндөгү күйүүчү май 70 сом 70 тыйындан, дизель майы 72 сом 80 тыйындан, ал эми унаа газынын литри 32 сом 70 тыйындан сатылууда.
АБА ЫРАЙЫ23-апрелге караган түнү көпчүлүк аймактарда жаан жаайт. Бийик тоолуу райондордо жолдор тоңголок жана тайгак болот 23-апрель, шейшембиде көпчүлүк аймактарда өткүн өтүп, күн күркүрөшү, бийик тоолуу райондордо кар жаашы күтүлөт. Батыштан соккон шамалдын ылдамдыгы секундасына 4-9метрге жетет. Бул тууралуу Кыргызгидромет билдирди. Абанын температурасы Чүйдө +20...+25, Талас аймагында +18...+23, Ош, Жалал-Абад жана Баткен облустарында +22...+27, Ысык-Көл өрөөнүндө +17...+22, Нарында +15...+20 градус жылуу болот. Бишкек жана Ош шаарларында өткүн өтүп, күн күркүрөп, күндүн табы борбор калаада +21...+23, Ош шаарында +25...+27 градуска чейин көтөрүлөт.
Жаңылыктар түрмөгү
0