Касымова: үйүндө бала бакча ачкандарга маяна төлөп берүү каралууда
10:25 30.01.2024 (Жаңыртылды: 14:54 30.01.2024)
© Sputnik / Шабдан Абылгазы уулу
Жазылуу
Билим берүү жана илим министрлигинин мектепке чейинки билим берүү башкармалыгынын башчысы Нурзида Касымова өлкөдө 1 миллион 147 миң баладан 220 миңден ашыгы гана бала бакчага барарын белгиледи.
Бир жашка чейинки ымыркайларды кемиткенде мектеп курагына чейинки балдардын 26,4 пайызы гана бала бакчага барат. Ушул көрсөткүчтү 2-3 жылдын ичинде эки эсеге жогорулатуу аракети көрүлүүдө. Бул тууралуу Нурзида Касымова Sputnik Кыргызстан радиосунда маек куруп жатып билдирди.
Касымова: үйүндө бала бакча ачкандарга маяна төлөп берүү каралууда
Анын айтымында, бала бакча менен толук камсыздоо үчүн мамлекеттин чама-чаркы жетпейт.
"Өткөн жылга салыштырмалуу быйыл 30 миңге көп бала төрөлдү. Мына ушул калктын өсүү темпин эске алуу менен бала бакчаларды куруу зарыл. Учурда мектепке чейинки билим берүүнү 100 пайызга жеткирүү үчүн 280 орундуу 10 саат иштеген 2 347 бала бакча курулушу керек. Буга мамлекеттин чама-чаркы жетпейт. Ошондуктан мектепке чейинки билим берүү кызматтарын көрсөтүүгө басым жасалууда. Ал үчүн үй шартындагы бала бакчаларды ачууга уруксат берилди. Тийиштүү талаптарды аткарып, үйдүн ичинде эле 25 балага чейин алып бала бакча ачса болот. Мындан тышкары, 2018-жылдан бери кыска мөөнөттүү бала бакчаларды ачуу үчүн окутуулар жүргүзүлдү. Бул форматка ылайык, түшкө чейин 25, түштөн кийин 25 бала окуу компонентин гана камтыган бала бакчага барат. Бул багытта 2025-жылдын май айына чейин 560 кыска мөөнөттүү бала бакчаны ишке киргизүү пландалган. Мындан тышкары, бала бакча имаратын натыйжалуу пайдалануу максатында санитардык нормаларга өзгөртүүлөр киргизилүүдө. Ага ылайык, эки саат гана колдонула турган балдар уктай турган бөлмөлөр ойноочу бөлмө катары пайдаланалууда. Демилге Биринчи май районунда сыналып, оптималдаштырылгандан кийин балдардын саны 325тен 480ге жеткирилди. Учурда Жети-Өгүздө дагы жергиликтүү бийликтин колдоосу менен эки бала бакча оптималдаштырылды. Эми аны эки шаар, жети облуста сынамык иретинде киргизип, андан ары жайылтуу мерчемделүүдө. Натыйжада 122 миң балага кошумча орун түзүлөт. Ошондой эле үйүндө бала бакча ачкандарга мамлекет тарабынан маяна төлөп берүү механизмин киргизүү дагы каралууда", — деди Касымова.
Ошондой эле ал мекеме, ишкана, уюмдарда кызматкерлердин балдары үчүн балдарды өнүктүрүүчү бөлмө ачууну жайылтуу пландалганын кошумчалады.
