Максат — өлкө бүтүндүгүн сактоо. С.Жапаровдун президенттигине 3 жыл болду
16:19 28.01.2024 (Жаңыртылды: 16:32 28.01.2024)
Жазылуу
Ал социалдык тармактагы постуна учурдагы бийлик жасап жаткан жана жасалган иштерди 34 пункт менен тизмектеп берген.
БИШКЕК, 28-янв. — Sputnik. Садыр Жапаровдун президенттик кызматына киришкенине 3 жыл болду. Буга карата мамлекет башчынын маалымат кызматынын жетекчиси Дайыр Орунбеков Жапаровдун мамлекетти башкарган бул учурдагы иштерин социалдык тармакка тизмектеп жазган.
"Баарыбыздын көздөгөн максатыбыз – Кыргызстандын аймактык бүтүндүгүн сактоо, коомдун жашоо-турмушун турукташтыруу, өлкө коопсуздугун камсыз кылуу, өлкө экономикасын ар тараптуу өнүктүрүү, калк турмушун жакшыртуу, ошондой эле илим-билимдүү, таалим-тарбиялуу, дени сак, акыл-эси тунук жаңы муундун өкүлдөрүн өстүрүү", — деген маалымат кызматтынын жетекчиси.
Ал Садыр Жапаров мамлекеттик максаттарды мындан ары да ишке ашыра алат деген ишеними туурасында айткан.
"Эркиндигинен ажырап, саясий кысым менен бүт мүмкүнчүлүктөрү чектелгенине карабай максаттарына жеткен Садыр Жапаровго, бүгүнкү күндөгү мүмкүнчүлүктөрүн колдонуу менен мындан ары да мамлекеттик максаттарды ишке ашыра алат деп ишенишибиз керек!" — деген Орунбеков.
Ал социалдык тармактагы постуна жасалып жаткан жана жасалган иштер туурасында 34 пункт менен тизмектеп берген.
Президенттик башкаруу системасынын киргизилиши, "Кумтөрдүн" мамлекетке өтүшү, коррупция жана уюшкан кылмыштуу топтор менен болгон күрөш туурасында айткан.
"Алар бийликтин колдоосуна таянып ишкерлерди тоноп, ар кимдин мүлкүн, байлыгын тартып алып тамыры жайылып кеткен. Бул бийликтин дагы бир эрктүүлүгү – уюшкан кылмыштуу топтун күлүн көккө сапырды", — деген ал.
Кырызстандын ички дүң продукциясы триллиондук чектен өткөнүн, куралдуу күчтөр боюнча тизмеде жети позиция алдыга жылып, 100 кубаттуу өлкөнүн, ал эми ЕАЭБ өлкөлөрүнүн ичинен алдыңкы 3 мамлекеттин катарына киргенин, энергетика тармагын жакшыртуу жаатында кескин чаралар башталганын, социалдык коргоо чөйрөсүнө жөлөк пулдар акыркы эки жылда үч этап менен көтөрүлгөнүн белгилеген.
Социалдык маанидеги мекемелердин салынышы арбыганына, Мамлекеттик ипотекалык компаниянын (МИК) уставдык капиталынын көбөйгөнүнө, экологияга мамиле жоопкерчилик менен жасалып жатканына, санариптештирүү акыркы үч жылда алда канча алдыга жылганына жана шаарларды, анын ичинде Бишкектеги коомдук транспортторду жаңылоо иштерине токтолгон.
Эске салсак, 2021-жылы президенттик шайлоодон кийин Садыр Жапаров 28-январда ант берип, мамлекеттик башчылык кызматка расмий киришкен.
"Бул жолу калың элдин жеңиши уурдалбайт, аруу мүдөөсү узурпация болбойт. Күн-түн дебей күч үрөп, бел чечпей иштеп, Камбар-Ата, Сары-Жаз ГЭСтери, Жогорку Нарын каскады сындуу ири долбоорлорду тез арада ишке ашыруу, жумушчу орундарын түзүү аркылуу иш менен камсыздоону, миңдеген мигрант мекендештеримди кайтарып келүү президент катары милдетим деп эсептеймин. Президенттик башкаруунун максаты — мыйзамдын диктатурасы өкүм сүргөн, адилеттүүлүктүн үстөмдүгү салтанат курган алпейим коомду куруу", — деген 3 жыл мурда Жапаров.
Ант берүү учурунда кыргызстандыктарга кайрылып, биргеликте тарыхтын жаңы барагын жаратууга чакырган.
