Аманбаева: чет жерде жүргөн мекендештерди өлкөгө кайтаруу керек
© Sputnik / Асель Сыдыкова
Жазылуу
Россиянын Амур облусундагы Благовещенск шаарынын "Аалам" регионалдык коомдук уюмунун төрайымы Зарифа Аманбаева аталган аймакта 15 жылдан бери иштээрин айтты.
Чет жакта мекендештердин арыз-муӊун угуп, укуктарын коргоп жардам берип жүргөн Зарифа Аманбаева Кыргызстанга көп жылдан соӊ Элдик курултайга катышуу үчүн келген. Ал Sputnik Кыргызстан радиосунун эфиринде маек куруп жатып чет өлкөдө жүргөн мигранттарынын тушуккан көйгөйлөрүн айтып берди.
Аманбаева: чет жерде жүргөн мекендештерди өлкөгө кайтаруу керек
Аманбаеванын пикиринде, кыргыздар өз өлкөсүндө иштеп, акчасын жашоо шартын жакшыртууга эмес, тойго жумшайт.
"Бул жакка келип, мен алдыга жылып, өнүгүп бара жаткан Кыргызстанды көрдүм. "Жаман айтпай, жакшы жок" дегендей, биздеги кемчиликтерди да айтып кетишим керек. Биздин мекендештер убактылуу каттоо процессинен кыйналышат. Буга чейин бул маселе көтөрүлүп жатып, азыр абал кыйла жакшырып калды. Ошентсе да бул жаатта мүчүлүштүктөр бар. Алсак, эмгек келишими жок үч айга каттоого тургузушат. Ал эми үч айдан соӊ каттоону узартыш үчүн эмгек келишими керек болот. Бирок Россияда оӊой менен келишим түзүп ишке ала койбойт. Андыктан бул жакка келген мигранттар "өзүн-өзү иш менен камсыздоочу" статусун толтургандан кийин автоматтык түрдө каттоого турууга мүмкүнчүлүк берилсе сонун болот эле. Андан тышкары, кыргыз жарандарын чет мамлекетте калтырбай мекенге кайтаруу аракеттери көрүлүшү керек деп эсептейм. Угушум боюнча, өлкөдөгү тигүү цехтери өнүгүп, айлыгы жакшы экен. Бирок чет элдик жарандар иштеп жатышыптыр. Мекендештер өз өлкөсүнө келип иштесе өнүгүү батыраак болот беле деген ой. Россияга келген кыргызстандыктар өлкөдө айлык акы төмөн деген маселени айтышат. Иш жүзүнө келгенде бул жакта да ошондой эле каражат тапса болот экен. Бирок, тилекке каршы, кыргыздар өз өлкөсүндө иштеп, акчасын жашоо шартын жакшыртууга эмес, тойго жумшайт жана ошондон улам азыраак иштейт", — деди Аманбаева.
Ал Кыргызстанда тигүү, курулуш тармагында иштеген жарандарга эмгек китепчесин берүү маселеси каралышы керектигин кошумчалады.
