"Учкун": жаңы окуу китептери басылып чыкты, тартыштык үч жылда жоюлат
© Sputnik / Асель Сыдыкова
Жазылуу
"Учкун" мамлекеттик басмаканасынын директорунун орун басары Турсунбек Бейшенбеков окуу китептеринин тартыштык көйгөйү үч жылда чечилерин айтты.
Окуу китептери "Учкун" мамлекеттик басмаканасынан гана басылып чыгып жатат. Бул 2022-жылдын октябрь айында президенттин чыгарган жарлыгына ылайык ишке ашып жатканын Турсунбек Бейшенбеков Sputnik Кыргызстан радиосуна билдирди.
"Учкун": жаңы окуу китептери басылып чыкты, тартыштык үч жылда жоюлат
Анын айтымында, мурда Билим берүү жана илим министрлиги окуу китептерин чыгаруу укугун жеке менчик басмаканаларга берген болчу.
"Окуу китептерин мамлекеттик басмакана болгон "Учкун" ААКтан басып чыгаруу жарлыгы чыккан соң Билим берүү жана илим министрлиги ички процедураларын жүргүзүп, жоболорду иштеп чыкты. Мунун баары бир күндө бүтүп калчу иш эмес экен. Ошондуктан китептер эми басылып чыгууда. Жайкы каникул учурунда эле даярдап койбойт белеңер деген нааразычылыктарды биз да угуп жатабыз. Бирок министрлик тиешелүү иштерин бүтүп, китептерди басмага даярдап бизге буюртма берген соң гана ишке кирише алабыз. Экинчи көйгөй — буга чейин министрлик окуу китептерди чыгаруу укугун жеке менчик басмаканаларга бергендиктен автордук укук да аларда болуп калган. Бул да тоскоолдук жаратты. Министрлик өзү ээлик кылган китептерин бизге берди, аларды басып чыгарып аймактарга таратып жатабыз. Жакынкы күндөрү 1-класстар үчүн "Алиппе" китебин басуу планы турат. Көңүл кубантарлык жагдай, буга чейин министрлик китеп чыгарууга бөлүнгөн каражатты толук кандуу иштете албай Финансы министрлигине кайтарып турса, эми чечкиндүү кадамдарга барып бөлүнгөн каражаттын баарына китеп чыгарууга белсенип жатат. Тактап айтсак, эгемендүүлүк алгандан бери окуу китептерин чыгарууга бюджеттен 122 миллиондон 152 миллион сомго чейин, ар жылы ар кандай суммада каражат бөлүнүп, толук иштетилбей келген", — деди Бейшенбеков.
Ал "Учкун" мамлекеттик басмаканасы окуу китептерин чыгарууга техникалык жактан 7-8 ай мурда эле даяр болгонун жана учурда күнүнө 10-15 миң нуска китеп чыгара аларын кошумчалады.
