Жогорку Кеңеш депутаттык этика кодексинин долбоорун сунуштады
Жазылуу
Документти 11 эл өкүлү демилгеледи.
БИШКЕК, 26-июл. — Sputnik. Жогорку Кеңеш депутаттык этика кодексинин долбоорун сунуштады.
Документ 11 бөлүмдөн турат. Анда депутаттын жыйындарда, шайлоочулар, ЖМКлар, аткаминерлер жана башкалар менен иштөөдө өзүн алып жүрүүсү регламенттелген.
Демилгечилер: Нурланбек Азыгалиев, Чолпон Султанбекова, Дастан Жумабеков, Замирбек Мамасадыков, Марлен Маматалиев, Айбек Алтынбеков, Гүлшаркан Култаева, Эмил Токтошев, Жылдыз Таалайбек кызы, Эльвира Сурабалдиева жана Дастан Бекешев.
Урунттуу учурлары:
Депутат Жогорку Кеңештин имаратында, ошондой эле анын чегинен тышкары өзүнүн кадыр-баркына, Жогорку Кеңештин беделине жана жалпы эле мамлекетке залал келтириши мүмкүн болгон ар кандай иштен жана жосундардан карманууга тийиш;
Эл өкүлү башка депутаттардын, кызмат адамдарынын жана жарандардын ар-намысын сыйлоого тийиш. Башка депутаттын ар-намысына жана кадыр-баркына залал келтирүүчү, ошондой эле кемсинтүүчү формадагы кеп-сөздү айтууга жол берилбейт;
Теги, расасы, улуту, дин тутуусу жана диний ынанымдары, жеке же коомдук мүнөздөгү кандайдыр бир башка шарттар жана жагдайлар боюнча басмырлоонун ар кандай түрүнө, укугун жана эркиндигин чектөөгө тыюу салынат;
Жогорку Кеңеште ар кандай мүмкүн болуучу асылууларга, анын ичинде сексуалдык асылууларга тыюу салынат.
Депутаттын Жогорку Кеңештин, депутаттык фракциялардын, депутаттык топтордун, комитеттердин жана убактылуу комиссиялардын жыйналыштарынан тышкары жүрүм-туруму ушул Кодексте баяндалган принциптерге шайкеш келиши керек. Ошондой эле өз үлгүсүндө жарандык милдеттердин аткарылышына, адам укуктарынын камсыздалышына, мыйзамдардын, этикалык жана моралдык ченемдердин сакталышына түрткү бериши керек;
Депутат өзүнүн ишинде Кыргыз Республикасынын кызыкчылыктарын коргоого, Конституцияны, "Кыргыз Республикасынын Жогорку Кеңешинин депутатынын статусу жөнүндө" мыйзамды, Жогорку Кеңештин регламентин, Кыргыз Республикасынын дагы башка нормативдик укуктук актыларын жана ушул кодексти сактоого тийиш.
