TikTok аккаунт эмнеге жабылып калат? Кыргызстандык журналисттин кеңештери
© AFP / OLIVIER DOULIERY
Жазылуу
Журналист мамлекеттик жана муниципалдык кызматтын маалымат катчыларына мастер-класс өттү.
БИШКЕК, 23-июн. — Sputnik. TikTok социалдык тармагында эмнелерди көрсөткөнгө болбой турганын жасалма интеллект автоматтык түрдө аныктап коет. Бул тууралуу Sputnik Кыргызстан маалымат агенттигинин журналисти Гүлдана Талантбекова айтып берди.
Ал SputnikPro долбоорунун алкагында Sputnik Кыргызстандын маалымат борборунда мастер-класс өткөрдү. Иш-чарага мамлекеттик жана муниципалдык кызматтын маалымат катчылары катышты.
Талантбекова TikTok аккаунттар анын эрежелерин сактабай, алгоритмге туура келбеген видеолорду жүктөгөндөн улам окурмандарга сунушталбай банга түшүп же өчүп каларын айтты. Мындай эреже бузуу көп болсо баракчанын өзү да жабылып калышы ыктымал.
Эмнелерди жүктөгөнгө болбойт:
курал-жарактар. Өтө зарыл сүрөттөрдүн же анда маанилүү адам турса куралын жаап туруп колдонууга уруксат;
террористтик, экстремисттик аракеттер, чакырыктар. Бул сөздөр жана бомба деген сөз символ менен жазылып, аудиодон үнү басылышы керек;
мушташ, зордук-зомбулук. Жадагалса спорттук ыкмаларды да көрсөткөнгө болбойт. Анан кыйкырыктар, мисалы, бирөөнү бирөө сабап жаткандагы үндөр, кошок, улуп ыйлагандар болбойт;
ачык жаракаттар, кан, кишинин сөөгү. Зарыл учурда кадрларды жакшылап жаап туруп берсе болот;
кичинекей балдар кадрда чоңдордун коштоосунда болушу керек;
сексуалдык аракеттер же ошого жакын кадрлар. Секс деген сөздү символ менен берген оң;
наркотик, алкоголь, тамеки;
азарттык же лотереялык оюндар;
бирөөнү мазактоо аракеттери, бөтөнчө жаш балдарды;
өрт, жарылуулар же согуштук аракеттер;
жаныбарларга карата зомбулук аракеттер;
бычак же коркунучтуу предметтин кадрлары;
жеке маалыматтардын сүрөттөрүн — паспорт, айдоочулук күбөлүк дегендерди чыгарганга болбойт;
музыканы абайлап пайдалануу керек, автордук укук болбосо роликтин үнү автоматтык түрдө өчөт;
кадрдын сапаты өтө начар болсо дагы алгоритмден өтпөйт;
кооптуу аракеттерди чагылдырган аракеттер: сууга чөккөн сыяктуу аракеттер, унаадан белден ылдый чыгып алуу, имараттардан секирүү ж.б.;
жарнама, телефон номерлер, реквизиттер жазылган роликтерди дагы бул социалдык тармак окурмандарга сунуштабайт;
TikTok эксклюзив видеолорду көбүрөөк алдыга жылдырат.
