Коомдогу жаман адаттар, алтынды сактоо. Жапаровдун майрамда жасаган билдирүүсү
12:27 21.03.2023 (Жаңыртылды: 12:50 21.03.2023)
Жазылуу
Мамлекет башчы кыргызстандыктарды куттуктап жатып өлкөдөгү кырдаал боюнча билдирүү жасады.
БИШКЕК, 21-мар. — Sputnik. Президент Садыр Жапаров “Ала-Тоо” аянтында Нооруз майрамына карата салтанатта куттуктоо сөзүн сүйлөдү.
Мамлекет башчы жалпы кыргызстандыктарга, алыс-жакында жүргөн мекендештерге жалаң жакшылыктарды, жаратман иштерди, ийгиликтерди каалады.
Аны менен катар өлкөдөгү кырдаал боюнча билдирүү жасады. Маанилүү учурларын тизмектейбиз:
“Баткен өнүксө, мамлекет өнүгөт!” деп кийинки муундарга чек арасы толук такталган, тынчтыкта жана бейпилдикте жашаган жаңы Кыргызстанды өткөрүп беребиз деп сөз бергенбиз. Биз бул ишти сөзсүз аягына чыгарабыз;
Кыргызстандын эгемендүүлүк тарыхында болуп көрбөгөндөй көлөмдө алтын корун топтоого жетиштик, аны ар кандай кырдаалдардын камын көрүү үчүн коопсуздук каражатынын топтому катары кармап турабыз;
Буга чейин коомубузда чоң-кичине, кары-жаш дебей, ар ким өз милдетин кылбай өлкөнүн саясаты менен көбүрөөк алектенип, улуттук экономика жаатындагы маселелерге кош көңүл мамиле жасалып, маани берилбей калган. Кокту-колот, уруу-урук, жердешчилик, тааныш-билиш саясаты коомчулуктун баш оорусуна айланган;
Ар бир жаңы келген жетекчи өлкөнүн өнүгүшүн кечеңдеткен жагдайларга өздөрүнө чейинкилерди шылтоо кылмай адат болуп калган. Биз мындайды токтотушубуз керек! Булардын баары өнүгүүгө кедергисин тийгизип, азыркыга чейин кесепетин тартып келебиз;
Заман ыкчам өнүгүп, дүйнө өлкөлөрүнүн алдында жаңы талаптар, жаңы чакырыктар коюлууда. Мындай өзгөрүүлөрдүн фонунда Кыргызстан бир силкинип, жаңыча ойлонууга, жаңы көз караштарды калыптандырууга умтулушу абзел;
Эки жылдан бери өлкөбүздө бекем ынтымагыбыз, жапырт аракетибиз менен көзгө көрүнөрлүк иштер жасалып жатат. Өткөөл кезең аяктап, өнүгүү көчү башталды десек болот;
Биз стратегиялык өнөктөштөрдү күтүп, тарапташ жана дос өлкөлөрдү таап, алар менен кызматташуу процессин жолго койдук;
Бүгүнкү күндө да Кыргызстан элинин артыкчылыгы, дөөлөтү, эгемендүүлүгүбүздү бекемдеген асыл наркы – ынтымак, биримдик болушу керек! Аталарыбыздын “ынтымагы бар элдин ырыскысы мол болот” деп айткан таасын кебин көкүрөгүбүздө ыйык тумардай аздектеп сактап жүрөлү.
21 Жалган Куран 2023, 11:16
