Бийик имарат курууда алгач эмнеге маани берүү керек? Архитектордун жообу
© Sputnik / Асел Акмат
Жазылуу
Архитектор Нурислам Мырзаканов көп кабаттуу үйлөрдөн турак жай сатып алууда фирманын ээси менен бирге эле кардардын да жоопкерчилиги күч болушу керектигин айтты.
Имараттарды куруп жатканда эң биринчи жер кыртышына баа берүү шарт. Бул тууралуу Нурислам Мырзаканов Sputnik Кыргызстан радиосунун эфиринде маек куруп жатып билдирди.
Бийик имарат курууда алгач эмнеге маани берүү керек? Архитектордун жообу
Анын айтымында, Кыргызстан 90 пайыз тоолуу өлкө болгондуктан, 9 баллдык жер титирөө болушу мүмкүн деген коркунуч бар.
"Имарат куруп жатканда эң алгач жер кыртышына маани берүү керек. Биз жер титирөө боюнча кооптуу аймакта турабыз. Кыргызстан 90 пайыз тоолуу өлкө болгондуктан, 9 баллдык жер титирөө болушу мүмкүн деген коркунуч бар. Бүгүнкү күндө айрым куруучулар интернеттен эле бийик кабаттуу үйлөрдү кантип куруу керектигин карап, андан таасир алып жатышат. Мисалга, Россияны ала турган болсок ал жакта анчалык коркунуч жок. Ал өлкөнүн мисалындагы видеолор бизге жарабай турганын эске алуу шарт. Жер титирөө катуу болушу мүмкүн болгон жерлерде ошого жараша имараттарды салуу өтө маанилүү. Мында фирманын ээси менен катар эле үй сатып алуучу да жоопкерчиликти сезиши керек. Канчалык сапаттуу же сапатсыз салынып жаткандыгы барып көргөндө эле билинет. Биздеги курулуп жаткан үйлөр 50 жылдык жана андан ашык убакытка кепилдик менен берилет. Ошол үчүн бул жерде эрежелердин жана талаптардын сакталышы өтө маанилүү", — деди архитектор.
Ал жер титирөө болгон учурда ылдыйкы кабаттагы үйлөргө караганда жогорку кабаттагылар көбүрөөк коркунучка дуушар болорун кошумчалады.
