Жогорку Кеңеш мас айдоочуларды күбөлүктөн ажыратуу мыйзамын кабыл алды
14:36 29.12.2022 (Жаңыртылды: 14:37 29.12.2022)
Жазылуу
Мыйзамда кээ бир айып пулдардын суммасын жогорулатуу дагы каралган.
БИШКЕК, 29-дек. — Sputnik. Мас болуп руль башкаргандарды айдоочулук күбөлүгүнөн ажыратууну караган мыйзам долбоорун Жогорку Кеңеш үч окуудан кабыл алды.
Ал документте, мындан сырткары, жол эрежесин бузуунун айрым түрлөрүнө айып пулду жогорулатуу боюнча да жазылган.
62 депутат "макул", экөө "каршы" добушун берип, парламент жактырды. Эми аталган мыйзам президент кол койгондон кийин күчүнө кирет.
Кабыл алынган мыйзамда камтылган нормалар:
ичимдик ичип автоунаа айдагандарга айып салынбайт, анын ордуна айдоочулук күбөлүгүнөн ажыратылат. Алгачкы ирет кармалганда бир жылга, дагы кайталанса үч жылга автокөлүк айдоого тыюу салынат. Азыркы кодексте мындай норма жок;
белгиленген ылдамдык нормадан саатына 40-60 чакырымга катуу айдаса 7 500 сом (учурда 5 500 сом), 60тан ашырса 15 000 сом (учурда 7 500 сом) айып пул салынат. Мисалы, айыл жергесинде белгиленген норма саатына 60 чакырым болуп, 100 менен айдаса, 120дан ашырса жогорудагы айыпка илинет;
каршы тилке менен айдоого 15 миң сом айып (учурда 5 500 сом);
эгер жол эрежесин кайталап бузса кайра экзамен тапшырып, айдоочулук күбөлүгүн кайталап алууга жөнөтүлөт;
автоээнбаштык кылгандар 15 миң сом төлөйт (учурда 7 500 сом);
салынган айып пулдарды 70 пайыздык жеңилдик менен төлөө мөөнөтү 15 күндөн бир айга узартылат;
автоунаасына этикага туура келбеген, мыйзамыз аракеттерге чакырган адаттан тыш жазууларды, сүрөттөрдү жабыштырып алса 5 500 сом айып салынат.
