Алимбаев: күч органдарынын иштөө шарты жакшырса кыйноолор азаят
© Sputnik / Асель Акмат
Жазылуу
Кыргызстандагы кыйноолорго каршы коалициянын юристи Эрлан Алимбаев азыркы учурда республика боюнча 7000ден ашуун жаран жаза өтөп жатканын айтты.
Кылмышка шектелип убактылуу кармоочу жайда отурган же жазасын өтөп жаткандарга карата кыйноолор азыркы учурда деле бар. Анын себептери арбын. Негизгиси болуп күч органдарында тиешелүү адистердин аздыгы, иш шарттарынын начардыгы жана адам укуктары боюнча тиешелүү билимдин жетишсиздиги эсептелет. Бул тууралуу Эрлан Алимбаев Sputnik Кыргызстан радиосуна маек куруп жатып билдирди.
Алимбаев: күч органдарынын иштөө шарты жакшырса кыйноолор азаят
Анын айтымында, азыркы учурда республика боюнча 7000ден ашуун жаран жаза өтөп жатат.
"Учурда көбүнесе жаран өзү мойнуна алган көрсөтмөлөр боюнча гана кылмыш иштери каралып жатат. Башкача айтканда, далилдер толук камтылып, башка да тараптардан иликтөө иштери чабал жүргүзүлүүдө. Буга башкы тергөөчүлөрдүн жумушунун көптүгү себеп. Мунун кесепетинен алар ар кандай жолдор менен, ошол эле кыйноо методун колдонуп болсо дагы жаранга мойнуна алдырууга жасаган далалаттар катталып келет. Андыктан биринчи кезекте ушул күч түзүмдөрүндөгү адистердин иштөө шарттарын жакшыртуу зарыл. Ошондой эле аларда ошол иштин аныктыгына жетүүгө кызыгуу жок болушу мүмкүн. Мунун баары аталган кызматкерлердин адам укуктары боюнча тиешелүү деңгээлде билиминин жоктугун айгинелейт. Азыр ар кандай окуулар өткөрүлүп эле жүрөт, бирок булар жетишсиз болуп жатканын тажрыйба өзү көрсөтүүдө. Окутуулар кайра-кайра мыйзам буза берип, күч органы тарабынан кыйноого кабылдым деп жалган жалаа жапкысы келген жарандардан сактанууга, аны болтурбай алдын-алууга да үйрөтөт", — деди Алимбаев.
Ал ошондой эле кыйноолордун азайышына коомчулук да өз таасирин тийгизе аларын, тилекке каршы, бизде "кылмышкерге карата кыйноо жасала берсин" деген көз караш калыптанып калганын кошумчалады.
