Ардагердин уулу: согуштун азабынан таяке-жээн бири-бирин тааныбай калган
Жазылуу
Мүнүшкөр Мурат Абдылдаев атасы, Улуу Ата Мекендик согуштун ардагери Керезбек Абдылдаевдин эскерүүлөрүнөн айтып берди.
Согуштун азабынан таяке-жээн бири-бирин тааныбай калган учур болгон экен. Бул тууралуу Мурат Абдылдаев Sputnik Кыргызстан радиосунун "Туяк" программасында маек куруп жатып айтып берди.
Ардагердин уулу: согуштун азабынан таяке-жээн бири-бирин тааныбай калган
Мурат Абдылдаевдин атасы Керезбек Абдылдаев 1941-1944-жылдары Улуу Ата Мекендик согушта болгон.
"Атамдын айтымында, согушка 19 жашында аттанган экен, Украин фронтунда болгон. Айрым учурларда көргөндөрүн эскерип айтып берер эле, согуш биз тасмалардан көрүп элестегендей эмес дечү. Мисалы, согушту чагылдырган тасмаларда жоокерлердин атышып, чуркап жүргөнүн көрөт эмеспизби. Ал тасманы кызыктуу кылыш үчүн көркөмдөлгөн окшобойбу. Жашоодо ок жамгырдай жаап, окоптон башы чыккандарга тиет деп эскерчү. Адамдардын өлгөнүнөн кадимкидей кан агып калган учурлар болгонун айтып берген. Атам үч жолу жаракат алып, акыркысында бутуна ок тийип 1944-жылы кайтып келген. Ал өзү ок тийгенин сезбептир. Көрсө ок бутун тешип, кан өтүгүнө толо берген экен. Бирөөнүн колун снаряд жулуп, ал кан агып бүткөнчө кыймылдай бергенин көрүптүр. Ошондуктан атам ал учурду эскергенде "согуш болбосо экен, тынчтык учурунда кара курсак тоё берет" деп көп айтар эле. Кийин 1944-жылы кайтканда Кочкорго барардан мурда Чүйгө келиптир. Токмоктон түшкөндө атам менен кошо дагы бир жоокер түшүптүр. Экөө сураша келсе Чүйдө атамдын жээни боло турган, ошол болуп чыгыптыр. Арыктап, согуштун азабынан таяке-жээн бири-бирин тааныбай калган экен", — деди Абдылдаев.
Ошондой эле ал атасы душманды туткунга түшүргөнүн айтып бергенин кошумчалады.
