Бишкекте төрт ооруканада эмгекке жарамсыздык боюнча санарип баракчалар берилүүдө
© Sputnik / Асель Сыдыкова
Жазылуу
Бишкек шаарынын Биринчи май райондук №3 үй-бүлөлүк медицина борборунун директору Мунаркан Өмүралиева борбор калаадагы №3, 5, 6, 9 үй-бүлөлүк дарыгерлер борборлорунда 1-июлдан тарта эмгекке жарамсыздык боюнча санарип баракчалары бериле баштаганын айтты.
Азыркы мезгилде санариптештирүү учурдун талабы болуп жатат. Андыктан Саламаттык сактоо министрлиги "Санарип MED" саламаттыкты сактоону өнүктүрүүнүн санариптик программасын ишке ашыруунун алкагында "Санарип эмгекке жарамсыздык баракчасы" маалымат тутумун иштеп чыкты. Бул тууралуу Мунаркан Өмүралиева Sputnik Кыргызстан радиосунун эфиринде маек куруп жатып билдирди.
Бишкекте төрт ооруканада эмгекке жарамсыздык боюнча санарип баракчалар берилүүдө
Анын айтымында, иш берүүчүлөр ооруган кызматкер жумушка кайтканда гана эмгекке жарамсыздык баракчасын сурашы керек. Ага чейин баракча берилбейт.
"Санарип эмгекке жарамсыздык баракчасы" системасы Бишкек шаарындагы төрт райондогу №3, 5, 6, 9 үй-бүлөлүк дарыгерлер борборлоруна пилоттук режимде ишке киргизилип, 1-июлдан тарта "санарип баракчалар" бериле баштады. Система аркылуу бул баракчалар QR-код менен корголгон санарип түрүндө чыгарылып берилет. Мындан ары бейтаптар дарыгерге кайрылган күндөн баштап, анын абалы тууралуу маалымат системага киргизилет да, ал эми эмгекке жарамсыздык баракчасын электрондук түрдө эле оорукананын сайтынан көчүрүп алса болот. Санарип эмгекке жарамсыздык баракчасын дарыгерге кайрылбаган адам ала албайт. Мурда адамдар ооруканага келип, ооруп, кайрыла албаганын айтып эле жаздыртып кетишчү эле. Азыр мындай мүмкүнчүлүк берилбейт. Эгерде Тез жардам, травмпункт же стационардын кабыл алуу блогу берген справкасын көрсөтсө, анда баракча ачып берилет. Маалымат системасы эмгекке жарамсыздык баракчасын берүү процессин автоматташтыруу үчүн иштелип чыкты. Ал баракчада бейтап тууралуу маалымат, документти берген саламаттык сактоо уюму, эмне менен ооруганы жана мөөнөтү жазылат", — деди Өмүралиева.
Ал санарип эмгекке жарамсыздык баракчасы медициналык тейлөөнүн сапатын жогорулатууга жардам берерин кошумчалады.
