Досалиев: Баткенге террорчулар киргенде Россия көмөк көрсөткөн
Жазылуу
Атайын кызматтын ардагери Нурлан Досалиев ЖККУнун таасир этүүчү саясий, аскердик инструменттери бар экенин белгиледи.
1999-жылы Баткенге террорчулар киргенде Россия көмөк көрсөткөн. Бул тууралуу Нурлан Досалиев Sputnik Кыргызстан радиосуна маек куруп жатып билдирди.
Досалиев: Баткенге террорчулар киргенде Россия көмөк көрсөткөн
Анын айтымында, ошол учурдагы өлкө жетекчилиги армиянын кереги жок деген позицияда эле.
"Казакстанда жылдын башында болгон окуя аталган өлкөнүн мамлекеттүлүгүнө коркунуч жараткан. ЖККУ аралашып Казакстандын мамлекеттүүлүгүн сактап калды. Чет өлкөнүн атайын кызматтары аталган өлкөнү бөлүп-жарып жарандык согуш чыгарууну пландашкан. Учурда тобокелчиликтер абдан көп. Ошону туура түшүнүү зарыл. Мисалы, Кыргызстан — экономикасы анча өнүкпөгөн чакан өлкө. Армия дагы экономикалык жагдайга жараша. 1999-жылы Баткенге эл аралык террордук топ киргенде болгону 12 гана согушкер болгон. Мына ошолор бүтүндөй өлкөнү дүрбөткөн. Ага чейин ошол убактагы өлкө жетекчилиги "СССР тарады, эми экинчи Швейцария болобуз. Армиянын кереги жок" деген түшүнүктө эле. Натыйжада террорчулар өлкө аймагына киргенде алгачкылардан болуп милицияны кармашкан. Алар милиция кызматкери катары даярдыктан өткөндүктөн аскердик чеберчилиги жетишсиз болчу. Ошондой эле тийиштүү курал-жарагы жок, аскердик техниканын абалы начар эле. Ал учурда ЖККУнун азыркыдай куралдуу күчү болгон эмес. Ошентсе дагы ага чейин түзүлгөн келишимдин негизинде Россия курал-жарак, атайын байланыш жабдыктарды берген", — деди Досалиев.
Ошондой эле ал өнөктөштөр көрсөткөн жардам менен террордук топ жок кылынганын кошумчалады.
