Ысык-Көлдүн тургундары эми пляждарга тоскоолдуксуз кире алат. Жапаровдун жарлыгы
16:04 13.05.2022 (Жаңыртылды: 16:17 13.05.2022)
Жазылуу
Жарлыктын талаптарын аткаруудан баш тарткан ижарачылар менен ижара келишимдерин бузуу тапшырмасы берилген.
БИШКЕК, 13-май — Sputnik. 2022-жылдын 1-июлунан тартып Ысык-Көл облусунун жергиликтүү тургундары көл жээгиндеги каалаган пляжга кирүү укугуна ээ болот. Бул тууралуу президенттин маалымат кызматы билдирди.
Аталган жарлыкка мамлекет башчы Садыр Жапаров кол койгон.
"Бүгүнкү күндө Ысык-Көлдөгү көптөгөн курорттук-рекреациялык объектилер (санаторийлер, пансионаттар, эс алуу үйлөрү, коттедждик конуштар) тосмолорду орнотуп, калктуу конуштардын тургундарын пляжга киргизбей жатат. Буга аймакта жайгашкан калктуу конуштардын тургундары нааразы болууда", — деп жазылган маалыматта.
Алардын экономикалык жана социалдык кызыкчылыктарын коргоо, пляждарга эркин кирүүсүн камсыздоо максатында аталган документ кабыл алынганы айтылды.
2022-жылдын 1-июлунан тарта аткарылчу тапшырмалар:
Жергиликтүү тургундардын алар жашаган конушка караштуу санаторийлердин, пансионаттардын, эс алуу үйлөрүнүн, коттедждердин аймагындагы пляждарга тоскоолдуксуз кирүүсү камсыз кылынсын;
Ысык-Көлдүн пляж аймактарында жайгашкан тосмолор (дубалдар, темир торлор, металл зым торлор) демонтаждалып, аларды мындан ары орнотууга тыюу салынсын;
Менчигинин түрүнө карабастан санаторийлердин, пансионаттардын, эс алуу үйлөрүнүн, коттедждик конуштардын жетекчилери пляж аймактарына биодааратканаларды коюуга милдеттендирилсин;
Калкка курорттук-рекреациялык объектилердин аймагында коомдук тартипти сактоо боюнча түшүндүрүү иштери жүргүзүлүп турсун;
Жарлыктын талаптарын аткаруудан баш тарткан ижарачылар менен ижара келишимдерин белгиленген тартипте бузуу каралган.
Бул иштерди аткаруу жоопкерчилиги президенттин Ысык-Көл облусундагы ыйгарым укуктуу өкүлүнө, райондук администрациялардын, жергиликтүү өз алдынча башкаруу органдарынын башчыларына, Балыкчы, Каракол, Чолпон-Ата шаарларынын мэрлерине, Ысык-Көл облусунун ички иштер башкармалыгынын начальнигине жүктөлгөнү айтылды.
Ал эми министрлер кабинетине 2022-жылдын 1-августуна чейин Ысык-Көл облусунун курорттук-рекреациялык аймагынын объектилерин куруунун, техникалык эксплуатациялоонун жаңы редакциясын иштеп чыгуу тапшырмасы берилген.
