Жекшенов: 27-апрелде болчу иш жарманкесинде 6 миң вакансия сунушталат
11:06 26.04.2022 (Жаңыртылды: 11:07 26.04.2022)
Жазылуу
Эмгек, социалдык камсыздоо жана миграция министрлигинин Бишкек шаардык иш менен камсыз кылууга көмөктөшүү башкармалыгынын жетекчисинин орун басары Талант Жекшенов адистер резюме даярдоого жардам берерин айтты.
27-апрелде саат 10:00дө Абдылас Малдыбаев атындагы Кыргыз опера жана балет театрында жумуш издегендер, ЖОЖ, колледждердин, кесиптик лицейлердин студенттери жана бүтүрүүчүлөрү үчүн бош орундардын жарманкеси өтөт. Бул тууралуу Талант Жекшенов Sputnik Кыргызстан радиосунда маек куруп жатып билдирди.
Жекшенов: 27-апрелде болчу иш жарманкесинде 6 миң вакансия сунушталат
Анын айтымында, жарманкеде бүтүрүүчүлөргө кесипке багыт берүү боюнча консультациялар берилет.
"Кезектеги жарманкеде 50 ишкана өнөр жай, курулуш, транспорт, соода, билим берүү, саламаттык сактоо жана тейлөө тармактары боюнча 2 000 бош жумуш орундарын сунуштайт. Ошондой эле Бишкек шаардык иш менен камсыз кылууга көмөктөшүү башкармалыгы тарабынан Бишкек шаары боюнча 3 500 жана республиканын аймактарынан 1 300 бош орун сунушталат. Жалпысынан 6 000ден ашык бош орун болот. Жарманкенин жүрүшүндө иш берүүчүлөр потенциалдуу талапкерлер менен консультация жана экспресс-интервьюларды өткөрүшөт. Жарандар ишке орноштурууга көмөк көрсөтүү кызматтары (ишке орноштуруу, кесиптик билим берүү, акы төлөнүүчү коомдук жумуштар, жумушсуздук боюнча жөлөк пулдар ж.б.), эмгек мыйзамдары боюнча кеңеш ала алышат. Ошол жерде адистер кыска маектешүү үчүн резюме даярдоого жана басып чыгарууга жардам берет. Кесип тандай элек мектеп бүтүрүүчүлөрү багыттоочу консультацияларды алышат. Ошону менен бирге кызыкчылыктарын жана компетенцияларын аныктоого жардам берген кесипке багыт берүү тесттеринен өтүшөт жана жөндөмүн, көндүмдөрүн арттырган оюндарына катыша алышат. Бош орундардын жана кесиптердин жарманкесине билим берүү уюмдары да катышат. Жогорку окуу жайлары өздөрү окутуп жаткан адистиктер, кесиптик лицейлер, жеке менчик окуу борборлору менен тааныштырып, окуу курстары тууралуу да айтып беришет", — деди Жекшенов.
Ал 2022-жылдын январь айына карата маалыматка ылайык республика боюнча 99 341 адам, ал эми Бишкекте 6 000ден ашык киши жумушсуз экенин кошумчалады.
