Садыр Жапаров актёр, китепканачы, соцкызматкер канча айлык ала баштаарын айтты
11:53 04.04.2022 (Жаңыртылды: 11:54 04.04.2022)
Жазылуу
1-апрелден тарта социалдык тармактын 309 миңге жакын кызматкерлеринин эмгек акысын жогорулатууга 2022-жылдын 9 айына кошумча 26 миллиард сом бөлүнгөнү маалым болду.
БИШКЕК, 4-апр. — Sputnik. Мамлекет башчы Садыр Жапаров Кыргызстандагы социалдык сектор кызматкерлеринин айлык маянасы канча сомго көтөрүлгөнүн айтып берди.
Белгилей кетсек, Садыр Жапаров бүгүн, 4-апрелде, социалдык тармак кызматкерлеринин Республикалык жыйынына катышкан.
Президент 1-апрелден тарта бир катар министрликтердин айлык акысын көтөрүү боюнча чечим кабыл алынганын белгиледи.
Маданият өкүлдөрүнүн көбөйгөн айлыгы:
Аламүдүн райондук борбордук китепкананын жетектөөчү китепканачысынын айлык акысы мурда 10 875 сом болсо, эми 21 845 сомго көбөйдү;
Нарындагы мамлекеттик тарыхый-этнографиялык музейдин жетектөөчү илимий кызматкери мурда 17 550 сом алса, эми 33 222 сом алат;
"Бабур" атындагы Ош академиялык театрынын актёру мурда 17 700 сом алса, эми 28 239 сом айлык алат;
Касымаалы Баялинов атындагы Республикалык балдар китепканасынын жетектөөчү китепканачысы мурда 9 000 сом айлык алса, эми 20 444 сом алат;
Соцкызматкерлердин көбөйгөн айлыгы:
Республикалык протездик-ортопедиялык буюмдар борборунун 14 жылдык тажрыйбасы бар өтүкчүсү 18 000 алса, эми 36 000 сом айлык алып калат;
Ат-Башы райондук социалдык коргоо башкармалыгынын кызматкерлери 7 500 сом алса, эми 14 000 сом ала баштайт.
Медиктердин көбөйтүлгөн айлыгы:
Садыр Жапаров медиктердин айлык акысы 50 пайызга жогорулатылганын айтып, категориялар үчүн төлөмдөр сакталганын белгиледи.
Сузак районундагы №15 үй-бүлөлүк дарыгерлер борборунун 32 жылдык иш тажрыйбасы бар дарыгери мурда 17 500 сом алса, эми 25 718 сом ала баштайт;
Ысык-Көл облустук бириккен ооруканасынын 14 жылдык иш тажрыйбасы бар медайымы мурда 11 000 сом алса, эми 17 248 сом ала баштайт.
Мугалимдердин көбөйтүлгөн айлыгы:
Президент Билим берүү министрлигине быйыл 16 миллиард сом ашык акча бөлүнгөнүн белгилеп, орто мектептердин айлык акысына дээрлик үч эседен ашык кошулду.
Лейлек районундагы башталгыч класстын мугалими Педагогикалык училищаны бүтүргөн иш тажрыйбасы жок мугалимге мурда 8 846 сом чегерилип, колуна 7200 сом алып келсе, 1-апрелден баштап ага 23 933 сом чегерилип, колуна 21 800 сом ала баштайт;
Ысык-Атадагы педагогикалык иш тажрыйбасы жок, бакалавр даражасындагы математика мугалими 10 миң 450 сом алса (чегерилгени 12 миң 907 сом), эми 25 миң 300 сом ала баштайт (чегерилгени 31 миң 333 сом).
Мамлекет башчы мугалимдердин айлыгы акырындык менен дагы көбөйө турганын айтып, бирок аларга талап катуу коюларын кошумчалады. Окутуучулар аттестациядан өтүп, ар бир мектепке 10-15тен жаңы мугалим алынарын кошумчалады.
1-апрелден тарта социалдык тармактын 309 миңге жакын кызматкеринин эмгек акысын жогорулатууга 2022-жылдын 9 айына кошумча 26 миллиард сом бөлүнгөнү маалым болду.
Жаңылыктарды кыска жана ыкчам окугуңуз келсе Telegram-каналыбызга катталыңыз.
8 Бирдин айы 2022, 18:33
