Таттыбүбү Турсунбаеванын сахнадагы акыркы ролу. Таберик сүрөт

Жазылуу
Sputnik Кыргызстан маалымат агенттиги архивде сакталган сейрек сүрөттөрдү жарыялап, анын тарыхын баяндоону улантат.
© Фото / из личного архива Нуркана Турсунбаева
Кыргыз ССРинин эмгек сиңирген артисти, белгилүү актриса Таттыбүбү Турсунбаева менен КРдин эл артисти Гүлсара Ажыбекованын сүрөтү 1981-жылы Фрунзе (азыркы Бишкек) шаарында тартылган.
Ал жылы экөө Токтоболот Абдумомунов атындагы Кыргыз улуттук академиялык драма театрында иштеп, сахнада коюлган Лопе де Веганын "Бий мугалими" спектаклинде Турсунбаева Фелисьянанын, Ажыбекова Флорелланын ролун аткарган.
Ошол кезди актриса Гүлсара Ажыбекова мындайча эскерет:
"Ал кезде театрда бирге иштеп, экөөбүз чогуу сахнага чыкчубуз. "Бий мугалими" спектаклин режиссер Офелия Эркимбаева койгон. Фелисьяна Таттыбүбүнүн театрда аткарган акыркы ролу болуп калды. Спектаклде Таттыбүбүнүн балконго чыгып сүйлөгөн жери бар. Мен ага тепкичтен басканга жардамдашып балконго чыгарчумун. Себеби актрисанын бутунан күч кетип калгандыктан муундары калчылдап калган эле. Башка курам жок болгондуктан экөөбүз чыкчубуз. Менимче, ал ошондон көп өтпөй, жарым жылдан кийин эле каза болуп калды. Негизи башка образдарды жаратуу пландарыбыз бар болчу, жакшы мамиледе болуп курбулардай акылдашып калчу элек. Режиссер  Эркимбаева да бизди башка спектаклдерге дуэт кылып чыгарганга аракет кылчу. Анткени Таттыбүбү лирикалык, мен драмалык типтеги актриса болуп экөөбүз сахнада бири-бирибизди толуктап калчубуз. Комедия жанрындагы чыгармада испан бийи, ыр-күү көп болчу. Көрүүчүлөр абдан жакшы кабыл алчу", — деди Ажыбекова.
Сүрөттөгү таланттар чыгармачылык жолунда театрда бир топ образдарды жаратып, кинокартиналарда роль аткарып, экөөнүн тең жылдыз жанып атагы алыска кеткен.
Ал жылы Турсунбаева 37, Ажыбекова 31 жашта болгон.
Тема боюнча:
Үч залкар. Эл артисттеринин Москвага концерт койгону баргандагы таберик сүрөтү
Казактын чөлүндөгү Асылбек Өзүбеков менен Тынара Абдразаева. Таберик сүрөт
Саякбайды жандаган акын-жазуучулар. 63 жыл мурун тартылган таберик сүрөт
Олжолонгон сулуулар, Чыңгыз хандын жан-жөкөрлөрү. Таберик сүрөт
Жаңылыктар түрмөгү
0