Исаков: инспекторлорго таякча берип койгондон реформа бузулуп кетпейт
Жазылуу
Бишкек ШИИББдин Милициянын кайгуул кызматы башкармалыгынын жетекчиси Алмаз Исаков 11 айда 2 390 автокырсык катталып, андан 53 адам көз жумгандыгын айтты.
Калк арасында жол коопсуздугун көзөмөлдөгөн кайгуул кызматынын инспекторлоруна таякчанын кайтарылып бериши боюнча түрдүү пикирлер айтылууда. Бул жүрүп жаткан реформаны бузуу же тоскоолдук жаратуу эмес, тескерисинче, жол кырсыктарын азайтуу максатында киргизилгенин Алмаз Исаков Sputnik Кыргызстан радиосунда маек куруп жатып билдирди.
Исаков: инспекторлорго таякча берип койгондон реформа бузулуп кетпейт
Анын айтымында, быйыл 11 айдын жыйынтыгы боюнча жол кырсыктарынан 3000дей адам жабыркаса, алардын 10 пайызы оор жаракат алган.
"Эл арасында жол инспекторлоруна таякчалардын кайтарылышы ар кандай пикирлерди жаратууда. Бул көрүнүш реформаны артка тартат дегендер жаңылышат. Анткени мунун баары иликтөө, байкоолордун негизинде ишке ашып отурат. Мисалы, бизде учурда 700дөй инспектор эмгектенет. Алар бир эле жол кыймылынын коопсуздугун көзөмөлдөшпөйт. Арасында мотоинспекторлор, атчан кайгуул кызматы, коомдук тартипти сактоо, 102 чакырыгына тез реакция кылуучу кызматкерлерибиз бар. Алар кандайдыр бир жол эрежесин бузууну көрсө дароо токтотуп, чара көрө алышпайт. Болгону кийинки постко маалымат берет. Бул жерде ар кандай учурлар болуп кетиши мүмкүн. Эгер колунда таякчасы болсо дароо токтотуп, айыпка жыгып же маселени чечет. Бир сөз менен айтканда, таякчалар кайра эле келип коомдук тартипти сактоо, жол кырсыктарын азайтуу, айдоочулардын жоопкерчилигин арттыруу максатында кайтарылды. Тилекке каршы, азыр айдоочулар арасында баңгизаттарын колдонуп алып рулга отургандар көбөйүүдө. Анын кесепетинен жогоруда айтылгандай окуялар жаралышы мүмкүн", — деди Исаков.
Ал инспекторлордун баары эле таякча алып тосо бербей тургандыгын, 102 чакырыгына бараткандар жана коомдук тартипти көзөмөлдөөчүлөр алгач коюлган түз тапшырманы аткарарын кошумчалады.
