БИШКЕК, 22-сен. — Sputnik. 24-28-сентябрь күндөрү Арменияда Наркозатка каршы кызматтардын, ички иштер органдарынын жана ЖККУнун Тез аракетке келүүчү жамааттык күчтөрүнүн атайын бөлүктөрүнүн катышуусунда "Гром-2021" аталыштагы машыгуу өткөрүлөт. Бул тууралуу маалымат аталган уюмдун расмий сайтына жарыяланды.
Машыгуу 2021-жылга ЖККУнун жамааттык коопсуздук тутумунун командалык-башкаруу органдарын, күчтөрүн жана каражаттарын биргелешип даярдоо планына ылайык өткөрүлөт.
Иш-чаранын биринчи этабында ЖККУга мүчө-мамлекеттердин компетенттүү органдарынын жана Армениянын Куралдуу күчтөрүнүн атайын даярдыктагы аскерлери татаал рельефтүү тоолуу шарттарда машыгып, тапшырмаларды аткарышат.
Ошол эле учурда ЖККУ күчтөрүнүн атайын штабынын ыкчам курамы менен атайын операцияларды пландоо жана өткөрүү боюнча окуу-машыгуулар өтөрү айтылды.
Иш-чаранын экинчи фазасында куралдан атуу боюнча жарыштар өткөрүлөт, ошондой эле атайын күчтөрдүн биргелешкен ыкчам-күжүрмөн топторунун практикалык иш-аракеттерин чечүүнүн жолдорун үйрөнүшөт.
