БИШКЕК, 7-сен. — Sputnik. Жаңы дайындалган коргоо министри Бактыбек Бекболотов генерал-майор наамына ээ болду. Бул тууралуу КР президентинин маалымат кызматынан билдиришти.
Аскердик жогорку наамдарды тапшыруу боюнча жарлыкка өлкө башчы кол койду. Эске салсак, Бактыбек Бекболотов коргоо министри болуп кечээ, 6-сентябрь күнү, дайындалган. Буга чейин ал Куралдуу күчтөрдүн полковниги болчу.
Андан тышкары, УКМКнын Чек ара кызматынын жетекчиси Уларбек Шаршеев дагы генерал-майор болду.
Ал эми буга чейинки коргоо министри Таалайбек Өмүралиев генерал-лейтенант наамын алды. Ушундай эле чинге Коопсуздук кеңешинин катчысы Марат Иманкулов татыды.
Буга чейин Кыргызстанда канча адам генерал наамын алгандыгы тууралуу Sputnik агенттигинин материалынан көрсөңүз болот.
