Гаитиде күчү 7,2 баллга жеткен жер титирөө катталды. Акыркы маалыматтарга ылайык, каза болгондордун саны 2 189га жетти. Жапа чеккендер 12 миңден ашты.
Кабул аэропортунда азыркы күндөгү абал чыңалган бойдон турат. Жергиликтүү тургундардын айрым бөлүгү өлкөдөн чыгып кетүүгө аракет кылууда. Кээ бирлери имараттарды басып алып эле тим болбостон, учактарды да курчоого алышкан. Бири-бирин тебелеп салгандын жана ок атуунун натыйжасында 40 киши көз жумган.
Россиянын президенти Владимир Путин менен Германиянын федералдык канцлери Ангела Меркель Москвада жолугушту. Сүйлөшүү дээрлик үч саатка созулуп, аягында маалымат жыйын курушту. Бул Меркелдин канцлер катары акыркы жолугушуусу болгону менен маанилүү. Буга чейин ал сентябрдагы шайлоого катышуудан баш тарта турганын айткан.
Филиппиндик кесипкөй бокстун чебери Мэнни Пакьяо кубалык Йорденис Угас менен бокстун WBA түрү боюнча жарым орто салмактагы дүйнө чемпиону наамы үчүн беттешти. Лас-Вегаста өткөн таймашта калыстардын бир добуштан чыгарган чечими менен жеңиш кубалык спортчуга ыйгарылды.
