Өлкөдө органикалык азык-түлүктөргө эл аралык деңгээлдеги сертификат берүүчү орган жок. Мындан улам өндүрүүчүлөр башка мамлекеттердеги атайын сертификат берүүчү мекемелерге кайрылууга аргасыз. Бул тууралуу Жанара Бакирова Sputnik Кыргызстан радиосунда маек куруп жатып билдирди.
Бакирова: өлкөдө органикалык азыкка эл аралык сертификат берчү орган жок
Анын айтымында, кымбат болгондуктан эл аралык сертификат алуу донорлордун көмөгү менен ишке ашырылууда.
"Соңку үч жылда органикалык айыл чарбаны өндүрүү саясаты активдешти. Ал үчүн тийиштүү нормативдик документтер кабыл алынып, аймактарга жеткирүү аракети көрүлүүдө. Бирок өлкөдө органикалык азык-түлүккө эл аралык сертификат берген орган жок. Ал үчүн ишкерлер өндүрүшүн тийиштүү стандарттарга ылайыктап, анан сертификациядан өткөрүүсү зарыл. Өлкөдө органикалык айыл чарба үч категорияга бөлүнгөн. Жеке чарбалар, органикалык аймактар жана эл аралык сертификаты бар өндүрүштөр. Акыркысы экспортко багытталган ишканалар. Эл аралык сертификат алуу кымбат болгондуктан жергиликтүү фермерлердин мүмкүнчүлүгү жетпейт. Ошондуктан алар донорлордун, ар кандай долбоорлордун көмөгү менен алышууда. Мындан сырткары, департаментте сынамык чарбалар түзүлгөн. Аларга органикага өтүү боюнча үч жылдык мөөнөт берилген. Учурда 105 сынамык чарбанын ишине мониторинг жүргүзүлүүдө. Ал эми республикада 23 органикалык аймак бар", — деди Бакирова.
Ошондой эле ал соңку жылдары биокаражаттарга болгон талаптын көбөйүп жатканын кошумчалады.
