БИШКЕК, 13-авг. — Sputnik. Талибан кыймылы Афганистандын борбору Кабул шаарына жакындап калды. Бул тууралуу РИА Новости Афганистанда иштеп жаткан Италиянын Pangea гуманитардык уюмунун президенти Ло Престиге шилтеме берүү менен жазды.
Ал Кабулда балдарга жана аялдарга жардам берип иштеген уюмдун 22 кызматкери калганын айткан. Алар медицина, чакан кредит берүү жана билим берүү жаатында колдоо көрсөтөт. Прести Италияда туруп РИА Новостиге телефон аркылуу жооп берген.
"Биз аябай тынчсызданып жатабыз. Себеби талибдер Кабулдун 50 чакырым гана ары жагында турат. Бүгүн таңда электр энергиясынын зымдарын үзүп салышты. Шаар дээрлик изоляцияга алынды", — деди Ло Прести.
Анын айтымында, бейөкмөт уюмдардын кызматкерлери телефонун кубаттай албай отурушат. Мындан улам алардын да коопсуздугун камсыздоо, калкка колдоо көрсөтүү иштерин улантуунун жолун издешүүдө.
"Биз Афганистанды таштап кетпейбиз. Акыркы жолу кызматкерлерибиз эртең менен телефондорунун кубаты өчүп жатканда ишин улантуу ниетин билдиришкен", — деди гуманитардык уюмдун президенти.
Согушкерлер өлкөнүн айыл жерлериндеги көптөгөн аймактарын ээлеп, чоң шаарларга кол салууда. Алар өткөн жуманын аягынан бери 34 провинциянын 10 административдик борборун, анын ичинде Зарандж, Пули-Хумри, Газни, Кундуз шаарларын басып алганын айтууда. Бул Тажикстандын чек арасынан 60 чакырым алыста жайгашкан. Кечээ Кандагар шаарын да өз карамагына алган. Ал эми афган өкмөтү айрым шаарларды кайра өзүнүн көзөмөлүнө кайтарып алганын билдирүүдө. Бирок кагылышуу токтой элек.
