Депутат Тотонов: Бишкек шаар эмес эле ат сарай, иткана болуп калды 

© Фото / пресс-служба ЖКЖогорку Кеңештин депутаты Нурбек Тотонов. Архив
Жогорку Кеңештин депутаты Нурбек Тотонов. Архив - Sputnik Кыргызстан, 1920, 27.07.2021
Жазылуу
Депутат Кыргызстандын көзгө басар жалгыз шаары Бишкектин кебетеси кеткенин айтып, аны ат сарайга салыштырды.

БИШКЕК, 27-июл. — Sputnik. Бишкектин кебетеси кетип шаар эмес эле айыл болуп калды. Бул туурасында Жогорку Кеңештин депутаты Нурбек Тотонов Транспорт, коммуникациялар, архитектура жана курулуш боюнча комитетинин жыйынында билдирди.

Эл өкүлү борбор калаада жөнөкөй эле кызмат көрсөтүүлөр иретке келтирилбегенин сынга алды.

“Кыргызстанда көзгө басар жалгыз шаарыбыз — Бишкек. Анын да кебетесин көрүп атабыз, ат сарай эле болуп калды. Баса албайсың, тротуар, аялдамалардын кебетеси кеткен, маршруткаларды айтпай эле коёлу. Европаны кыялданбай эле, Алматыны ээрчийличи. Алардын шаардык транспорту кирешелүү, баары так жүрөт. Бизде кубалашып эле жүргүнчүлөрдү илип кете берет. Шаардын кебетеси өлдү, айыл эле болуп калды. Сыймыктанып баса албайсың. Мэр же вице-мэр конкреттүү бир система менен иштеп жатканын көрбөйсүң”, — деди Тотонов.

Ошондой эле ал Бишкектен автобустар паркы жылына 500 миллион сомдук дотацияда турарын белгилеп, андан көрө муну жеке менчикке берүүнү сунуштады.

Киев жана Абдрахманов көчөлөрүнүн кесилиши. Архив - Sputnik Кыргызстан, 1920, 27.07.2021
Мэрия: Бишкектин борборунда экологияга зыянсыз автобустар гана каттайт 
“Жол кирени жыл сайын эле бир сомдон кошуп тургула, эл да кыйналбайт. Бензиндин баасы бизден беш эсе арзан Алматыда жол кире салыштырмалуу кымбат. Анан эле экономиканы ойлобой популизм менен “эл көтөрө албайт” деп кыйкырып коюшат. Системалуу реформага бара турган убакыт келди. Шаарыбыз аткана, иткана болуп кетти, көчөнүн баарын ит каптады. Аны кармайын десең “итти атканча мени ат” деп чыгат. Борбордук көчөлөрдүн ичи таштандыга толгон”, — деди депутат.

Аны менен катар учурда мэрдин милдетин аткарып жаткан Бактыбек Кудайбергеновду сындап, айыл өкмөт башчысын мэрликке отургузбай, чыныгы мэрди алып келүүгө чакырды.

Жаңылыктар түрмөгү
0