2020-жылы Көз карандысыз мамлекеттер шериктештигинин ичинен Тажикстан, Молдова жана Беларуста өлкө башчысы шайланды. Тажикстан менен Беларуста бийлик башына мурдагы эле ажолор келди. Ал эми Молдовада Игорь Додондун ордун Майя Санду ээледи.
Кыргызстанда болсо 5-6-октябрдагы элдик толкундоодон кийин Сооронбай Жээнбеков кетип, бир эмес эки киши президенттин милдетин аткарууга жетишти. Алар — учурда өлкө башчылыкка талапкер Садыр Жапаров менен президенттин милдетин аткаруучу Талант Мамытов.
Бүгүн Sputnik Кыргызстан КМШ мамлекеттеринин жаңы жетекчилеринин өмүрлүк жары менен тааныштырат.
Тажикстан
Коңшу мамлекетти чейрек кылымдан бери башкарып келип, быйыл кайра шайланган президент Эмомали Рахмоновдун үй-бүлөсү чоң. Жубайы Азизмо Асадуллаева экөө жети кыз, эки уулду тарбиялашкан. Бирок канайым тууралуу эмнегедир ачык маалыматтар аз. Ал жолдошун чет элдик сапарларда жана расмий иш-чараларда көп коштобойт.
Былтыр жергиликтүү ЖМКлар Рахмон Согди облусунда жубайы жана неберелери менен мөмө-жемиш терип жүргөн сүрөттөрдү жарыялаган.
Беларусь
Беларустун канайымы Галина Лукашенко быйыл 65 жашка чыкты. 1998-жылдан бери Могилевский облустук аткаруу комитетинде эмгектенип, санаториялык дарыланууну уюштуруу иштери менен алектенери айтылат. Айылда жашап, жолдошун иш-чараларда дээрлик коштоп жүрбөйт. Могилевский педагогикалык институтунун тарых факультетин аяктаган.
Молдова
Молдовада ноябрь айында шайлоо болуп, учурдагы президент Игорь Додон атаандашы Майя Сандуга утулуп калган. Санду шайлоочулардын 57,72 пайызынын добушуна жеткен. Өлкө Конституциясы боюнча, жаңы өлкө башкы шайлоодон 45 күн өткөнгө чейин ант берип, ишине киришүүсү керек.
Бүгүн биз 48 жаштагы жаңы өлкө башчынын жолдошу жөнүндө сөз кыла албайбыз. Анткени Санду турмушка чыга элек, балдары дагы жок. Анын жеке турмушу тууралуу маалымат негизи эле аз. Шайлоо кампаниясы учурунда интернетке Майя айымга окшогон аялдын башка аял менен жетелешип кетип бара жаткан сүрөтүн чыгарып, көпкө талкуулашкан. Бирок өзү бул нерсе жөн гана атаандаштардын каралоосу экенин айтып чыккан.
Кыргызстан
Кыргызстанда президенттин милдетин октябрь-ноябрь айларында Садыр Жапаров аткарып турду. Анын жубайы Айгүл Асанбаеваны айрым кыргызстандыктар мурда эле билчү. Анткени Айгүл айым жолдошу камакта жаткан кезде нааразычылык акцияларына чыгып, ЖМКларга маек берип келген. Асанбаева 47 жашта, жолдошунун коңшу айылынан.
Айрым булактарда жубайлардын беш, айрымдарында төрт баласы бар экени айтылат. Бирок Айгүл айым маектеринин биринде беш баласы бар экенин, алардын бири жол кырсыгынан каза тапкан кайнисинин уулу экенин айтып берген. Тилекке каршы, тун уулу Дастан былтыркы жылдын август айында жол кырсыгынан каза болгон.
Ал эми азыр президенттин милдетин аткарып жаткан Талант Мамытовдун жубайы — Чынара Апсаматова. Кесиби — фельдшер-акушер. 41 жаштагы Чынара айым учурда балдарды тарбиялоо менен алек. Төрт баланын энеси. Азырынча коомчулукка жолдошун коштоп чыга элек.
