БИШКЕК, 12-дек. — Sputnik. Кыргызстандын грек-рим күрөшүнүн балбандары Балбай Дордоков менен Халмурат Ибрагимов өз салмак даражаларында Дүйнө кубогу мелдешинин жарым финалына чыгышты. Беттешти UWW уюмунун расмий сайты түз алып берип жатат.
55 килограммда күрөшүп жаткан Дордоков жарым финалда россиялык Емин Сефершаев менен беттешет. Кыргыз балбаны чейрек финалда индиялык Алжун Халакуркини 10:5 эсебинде жеңсе, 8/1 баскычта украиналык Владислав Куськону 6:0 эсебинде утуп алган.
Ал эми 67 килограмм салмакта ат салышып жаткан Ибрагимов финалга чыгуу үчүн россиялык Назир Абдуллаев менен кармашат. Кыргызстандык балбан буга чейинки этапта индиялык Ашуну артыкчылык менен жеңген. Ал эми 8/1 финалда болсо франциялык Гажик Сноянды 11:5 эсебинде уткан болчу.
Бүгүн беттешке чыккан кыргызстандык балбандар Акжол Махмудов (77 килограмм), Руслан Царев (72 килограмм), Атабек Азисбеков (87 клиограмм) биринчи айлампада утулуп калышты.
Учурда жарым финалдык беттештердин алдында тыныгуу жарыяланды.
