БИШКЕК, 7-дек. — Sputnik. Баткен облусунан Өзбекстан күнүнө жер асты менен миңдеген тонна нефть алып жатат деген маалымат чындыкка дал келбейт. Мындай төгүндөөнү өкмөттүн Баткен облусундагы ыйгарым укуктуу өкүлчүлүгүнүн маалымат кызматы таратты.
Эске салсак, акыркы күндөрү бир катар ЖМКларда жана социалдык тармактарда Кадамжай районундагы кенден коңшу Өзбекстан нефть алып кетип жатат деп айтылган видео тараган.
Өкмөттүн өкүлчүлүгүнөн билдиришкендей, Советтер Союзу мезгилинде Кадамжай районунун Ак-Турпак айыл аймагына караштуу жалпы аянты 1400 гектарга жеткен жерге Өзбек ССРи тарабынан газ, нефть өндүрүүчү скважиналар курулган.
"Учурда бул аймакта нефть өндүрүлбөйт. Нефтини Өзбекстанга таандык "Фергана Нефти" (учурда "Андижаннефти" АКсы) 1950-жылдан 2011-жылдын 21-майына чейин иштетип келген. СССР маалында 108 скважина иштеп, союз таркагандан кийин жараксыз болгон скважиналарды өзбек тарап бузуп алып кеткен. 2011-жылы 18 скважина калган. Алардын ичинен тогуз скважина жараксыз абалда, тогузу иштейт, бирок 2011-жылдын 21-майынан бери токтоп турат", — деп айтылат билдирүүдө.
"Бул аймакты делимитациялоо жана демаркация толугу менен бүткөн, бирок объектилер өткөрүлүп бериле элек болгондуктан өзбек тарап бүгүнкү күнгө чейин ишканаларынын коопсуздугун кайтарып келет, бирок бир да скважина иштебейт. Жогоруда аталган мүлктөр кыргыз тарапка өтө электигине байланыштуу скважиналарды иштетүү мүмкүн эмес", — деп айтылат түшүндүрмөдө.
Ошондой эле бул маселе Кыргызстан менен Өзбекстандын чек араларды делимитациялоо боюнча өкмөттөр аралык комиссиясында айтылып жүргөнү кошумчаланды.
