БИШКЕК, 3-дек. — Sputnik. Ысык-Көл облусунун Тоӊ районунда автоунаалардын тетиктерин уурдаган деген шек менен беш өспүрүм кармалды. Бул туурасында облустук милициядан билдиришти.
Райондук милицияга арыз 25-ноябрда түшүп, Кызыл-Туу айылынын тургунуна тиешелүү автоунаанын тетиктерин белгисиз бирөөлөр чечип кеткени айтылган. Тагыраагы, үйүнүн жанында токтоп турган автоунаасынан түндө аккумулятор менен автомагнитола уурдалып, жалпы чыгым 11 миӊ сомдун тегерегин түзгөн.
Аталган фактыларды райондук милиция Кылмыш менен жоруктардын бирдиктүү реестрине каттап, Жазык кодексинин 200-беренеси ("Уурдоо") менен сотко чейинки өндүрүш иштери башталган.
Кылмыш жасоо ыкмалары изилденип, уурулук бир эле адамдардын тобу тарабынан жасалгандыгы түшүнүктүү болгон. Иликтөө иш-чараларын жүрүшүндө бул ырасталып, милиция 16 жаштан 17 жашка чейинки беш өспүрүмдү кармаган.
Алардын бардыгы Балыкчы шаарында ата-энелери менен жашап, муктаж эмес үй-бүлөлөрдөн болуп чыккан жана мурда кылмыш жоопкерчилигине тартылышкан эмес.
"Кармалган өспүрүмдөрдүн айтымында, иштелип чыккан схема боюнча уурулук кылып жүрүшкөн. Түнкүсүн коӊшу районго барып, сигнализация менен жабдылбаган автоунааны издешчү. Автокөлүк кароосуз экенине көздөрү жеткенде гана анын эшиктерин же терезелерин ачып, аккумуляторду жана автомагнитолаларды чыгарып алып турушкан. Уурдалган буюмдарды шаардын базарына сатып, андан түшкөн акчаны бош убактыларын өткөрүүгө жумшашкан", — деп айтылат маалыматта.
Тергөө амалдары учурунда аталган өспүрүмдөрдүн тобу 8 аккумулятор, 2 автомагнитола жана 1 дөңгөлөк уурдашканы аныкталды. Уурдоого шектүү катары кармалган өспүрүмдөргө аймактан тышкары чыкпоо милдеттендирилген.
Милициядан сотко чейинки өндүрүш ишинин алкагында өспүрүмдөрдүн Тоӊ районундагы башка ушундай уурулук фактыларын жасаган-жасабаганы текшерилип жатканын айтышты.
