БИШКЕК, 2-дек. — Sputnik. Бишкек шаардык кеңешинин депутаты Валентина Лесниченко борбор калаадагы мектеп окуучуларын 14-декабрдан тарта каникулга таратууну сунуштады.
Белгилей кетсек, бүгүн, 2-декабрда, шаардык кеңештин жыйыны өтүп жатат.
"Кышкы каникулду 14-декабрдан тарта баштоо маселесин карап көрбөйлүбү. Эгер балдарды азыр каникулга таратып жиберсек, ата-энелери менен эс алууга шарт түзүлөт. 18-январдан тарта сабактарды офлайн режиминде баштаса болот", — деди Лесниченко.
Ал ошондой эле эгер январда балдар мектепке бара баштаса, аларды жеке коргонуучу каражаттар менен камсыздоо керектигин белгиледи.
"Келгиле, Билим берүү министрлигине кайрылалы. Мен ведомствонун жана Республикалык штабдын жетекчилери менен сүйлөшүп көрөйүн. Дезинфекцияга керектелчү акчаны өзүбүз эле табаарбыз. Ачыгын айтсам, коронавирус менен күрөшүүгө 5 миллион сомдой акча катып койгом, ошону колдонсок болот", — деди Түлөбаев.
Буга чейин вице-премьер жана Республикалык штабдын жетекчиси Эльвира Сурабалдиева жакында мектептер менен жогорку окуу жайлар офлайн режимине өтө турганын айткан.
