БИШКЕК, 17-ноя. — Sputnik. Азыркы тапта өлкө боюнча 132 бала бакча иштеп жатат. Анын 11и мамлекетке карайт. Бул тууралуу Билим берүү жана илим министрлигинин маалымат кызматы кабарлады.
Ага ылайык, учурда Талас, Нарын, Ысык-Көл облустарында жана Ош шаарында менчигинин түрүнө карабастан бир дагы бала бакча ачыла элек.
Ал эми Чүй облусу боюнча 21 жеке менчик бала бакча иштеп жатканы айтылды. Анын 17си Аламүдүн районунда, экөө Москва районунда, экөө Жайыл районунда жайгашкан.
Ош облусунда 20 жеке менчик бакча балдарды тарбиялоодо. Анын 14ү Кара-Суу районунда болсо, алтоо Араван районунда жайгашкан. Ушул эле облуста угуусу начарлар үчүн адистештирилген бир бакча иштеп жатканы айтылды.
Баткен облусунда 21 жеке менчик бала бакча ачык. Анын ичинен бешөө Баткен шаарында болсо, төртөө Кызыл-Кыя шаарында жайгашкан. Сүлүктү районунда 10, Кадамжайда эки жеке менчик бала бакча иштеп жатат. Ал эми мамлекеттик бала бакчалардан Кадамжайда бир, Сүлүктү шаарында алтоо бөбөктөрдү тарбиялап жатканы кошумчаланды.
Бишкек шаарында болсо жеке менчик бала бакчанын ичинен 39у ачык. Мындан тышкары, эки мамлекеттик бакча иштеп жатат. Анын бири Саламаттык сактоо министрлигине караштуу болсо, экинчиси президент менен өкмөттүн алдындагы ведомстволук бакча.
Министрлик жогорудагы бала бакчалар Санэпидемкөзөмөл департаментинин жергиликтүү башкармалыгынын уруксаты менен ачылып, иштеп жатканын белгиледи.
