БИШКЕК, 28-авг. — Sputnik. Президент Сооронбай Жээнбеков Кыргыз Республикасынын социалдык-экономикалык, интеллектуалдык жана маданий потенциалын өнүктүрүүгө олуттуу салым кошкондугу, кесиптик ишмердүүлүгүндө чоң жетишкендиктери үчүн бир катар инсандарга жогорку даражалуу сыйлыктарды ыйгарат. Бул тууралуу мамлекет башчынын маалымат кызматы билдирди.
Жээнбеков Кыргызстандын Көз карандысыздыгы күнүнө карата "КР мамлекеттик сыйлыктары менен сыйлоо жөнүндө" жарлыкка кол койгон.
Ага ылайык, I даражадагы Манас ордени менен Иса Ахунбаев атындагы КММАнын госпиталдык педиатрия кафедрасынын башчысы, КР Улуттук илимдер академиясынын академиги Дүйшө Кудаяров сыйланат.
Ал эми II даражадагы Манас ордени Иса Ахунбаев атындагы КММАнын госпиталдык хирургия кафедрасынын профессору, КР Улуттук илимдер академиясынын академиги Мамбет Мамакеевге ыйгарылат. Ошондой эле бул сыйлык акын, коомдук ишмер Омор Султановго да берилет.
Андан кийинки сапта турган III даражадагы Манас орденин коомдук ишмер Кемел Ашыралиев алат.
Жээнбеков COVID менен күрөшкөн 90 кызматкерге мамлекеттик сыйлык ыйгарды. Тизме
Даңк медалы төрт адамга тапшырылат:
- Салия Жолдошева — пенсионер;
- Мамыржан Рахимов — Баткен шаарынын мэри;
- Ахмаджон Рахимов — Кара-Суу балдар-өспүрүмдөр спорттук мектебинин эркин күрөш боюнча машыктыруучусу;
- Рая Султаналиева — Исхак Раззаков атындагы Кыргыз мамлекеттик техникалык университетинин илимий иштер жана тышкы байланыштар боюнча проректору.
