Канат Исаев: БШКнын документти албай койгону боюнча сотко кайрылабыз

Жазылуу
Партия лидери документти акыркы мөөнөткө чейин тапшырбай кармап турганына талапкерлердин тизмеси улам өзгөрүп жатканы себеп болгонун белгиледи.

БИШКЕК, 25-авг. — Sputnik. Борбордук шайлоо комиссиясынын "Кыргызстан" партиясынын документин артка кайтарганы боюнча сотко кайрылабыз. Бул тууралуу партия лидери Канатбек Исаев БШК чечиминен кийин журналисттерге билдирди.

Ал ката кетиргенин моюнуна алып, бирок эскертүү берүү менен гана чектелсе болмоктугун билдирди.

"Мындай чечим бизди өтө өкүндүрөт. Шайлоо процесстеринде ар дайым мүчүлүштүктөр болуп турат. Борбордук шайлоо комиссиясы бул элдин тандоосуна канчалык деңгээлде таасир этерин эске алуу менен чечим чыгарышы керек да. Биздики шайлоо процессине таасир этпей турган техникалык ката болчу. БШКнын чечимине макул эмеспиз, сотко кайрылып адилеттүүлүктү издейбиз", — деди Исаев.

Ал эми документти акыркы мөөнөткө чейин кармап турганына талапкерлердин тизмеси улам өзгөрүп жатканы себеп болгонун белгиледи.

Белгилей кетсек, бүгүн БШК "Кыргызстан" партиясынын документтерин артка кайтаруу чечимин чыгарды. Бул талапкер катары кабыл алуудан баш тартты дегенди түшүндүрөт.

Шайлоого катышып жаткан партияларга ким канча акча бере алат. Тизме

Буга кечээ документти БШКга "Кыргызстандын" ыйгарым укуктуу өкүлү эмес, башка жаран алып келгени, ал дагы толук эмес экени негиз болду. Боршайкомдун мүчөлөрү мыйзамда партиянын ыйгарым укуктуу өкүлү өзү алып келип, каттоо журналына кол коюшу керектигин белгилейт. Ал эми аталган партиянын өкүлү Элвира Абелдинова жагдайды өзү кечээ алсырап, эти ысып, ооруп калганы менен түшүндүрдү.

Эскерте кетсек, кечээ, 24-августта, саат 18.00дө партиялар 5 миллион сомдук шайлоо күрөөсү менен талапкерлердин тизмесин тапшыруу мөөнөтү бүткөн. "Кыргызстан" партиясы саат 18.00 чамасында (так убактысы белгисиз) документин алып келген. Анда дагы кагаздары толук эмес болуп чыккан. Аталган партияны каттоого алып жатканын уккан башка партиялардын талапкерлери топтолуп БШКга келип, түндүн бир оокумуна чейин жагдайды териштирип "Кыргызстанды" каттоодон четтетүүнү талап кылышты.

Шайлоо алдында партиясына кол шилтеп, тагдырын башкага байлаган депутаттар

Босогодогу видеобайкоону алып чыкканда документти 18.00дөн кийин алып келгени көрүнгөн. Бирок БШК видеобайкоонун убактысы бир аз алдыда экенин айтып жатат. Каттоо журналында болсо партиянын өкүлдөрү саат 17.59да келгени жазылган. Бирок убакытты кайра өзгөртүп жазганы даана көрүнүп турат. Журналга партиянын өкүлүнүн колу дагы коюлган эмес.

Жогорку Кеңештин депутаттарын шайлоо быйыл 4-октябрда болот. Ага чейин кандай этаптардан өтүү талап кылынат жана шайлоодон кийинки кадамдар тууралуу Sputnik Кыргызстандын маалымдамасынан окуңуздар.

Жаңылыктар түрмөгү
0