БИШКЕК, 11-авг. — Sputnik. Ош шаарында коронавируска байланыштуу киргизилген чектөөлөр четинен алына баштаганын мэриянын маалымат кызматы кабарлады.
Ага ылайык, шаардык Жарандык коргонуу штабынын чечими менен Ош шаарынын кире беришине орнотулган бардык санитардык-карантиндик посттор алынган.
Мындан сырткары, тамактануучу жайлардын саат түнкү 12ге чейин иштөөсүнө уруксат берилди. Буга чейин 22:00гө чейин кызмат көрсөтүп келишкен.
Ал эми сейил бактар, парк жана аянтчалардын ишмердүүлүгүнө азырынча уруксат бериле элек.
Ошол эле учурда эпидемиологиялык кырдаал жакшыра электиги белгиленип, санитардык-гигиеналык эрежелерди сактоо зарыл экендиги эскертилди.
