БИШКЕК, 1-авг. — Sputnik. Кышында эл жарыксыз жана электр энергиясыз калбай турганын президент Сооронбай Жээнбеков "Биринчи радиого" берген маегинде билдирди.
Журналист бул суроону Токтогул суу сактагычындагы суунун көлөмүнүн азайышына байланыштуу берген.
"Былтыр тоолордо кар орто деңгээлде эле болду. Аба ырайына жараша Токтогулга келе турган суу 17 миллиарддын тегерегинде болот деген божомол болгон. Бирок, тилекке каршы, жайында жамгыр жаап, тоолорго кээде кар жаап, күн салкын болуп, тоодогу мөңгүлөр эрибей Токтогулга дагы, эл аралык маанидеги Киров, Орто-Токой, Папан суу сактагычтарына да суу азыраак келип калды", — деген президент.
Тааныш-билишти жоебуз! Президент кадр тандоонун жаңы ыкмасы ишке киргенин айтты
Ал белгилегендей, былтыркыга караганда суу азыр 2 миллиард 400 миллион кубга аз болуп турат.
"Суу июнь менен июль айларында көп келет. Август айын күтөлү, августтун башы кандай башталат, ошого карап, анан тиешелүү мамлекеттик органдар иш жүргүзөт. Жакшы үмүт менен жакшы тилек тилеп туралы. Элибиз жарыксыз, электр энергиясыз калбайт. Сырттан дагы электр энергиясын алып келүүгө аракеттер болот. Эсептөөлөрдү жүргүзүп жатабыз. Ага чейин өзүбүздүн мүмкүнчүлүк бар", — деген мамлекет башчы.
Президент кошумчалагандай, эгерде күн жылып суунун келиши көбөйсө, сырттан электр энергиясын сатып алганга зарылдык болбойт.
