БИШКЕК, 20-июл. — Sputnik. Россиянын Коргонуу министрлигинин катышуусунда иштелип чыккан COVID-19га каршы вакцинаны клиникалык сыноо аяктап, ыктыярчылардын акыркы тобу оорукадан чыгарыла баштады. Бул тууралуу аскердик биолог жана эпидемиолог, полковник Сергей Борисевичтин билдирүүсүнө таянып РИА Новости жазды.
"Гамалея атындагы илим-изилдөө борборунда жасалып, Бурденко атындагы аскердик госпиталда сыналып жаткан COVID-19га каршы вакцина эксперименттен өткөрүлүп бүтүп калды. Бүгүн, 20-июлда, госпиталдан ыктыярчылардын акыркы тобу чыгарылат", — деди ал.
Бирок Борисевич окумуштуулардын алдында жыйынтыктоочу отчет, препаратты мамлекеттик каттоодон өткөрүү сыяктуу аналитикалык бир топ иштер турганын кошумчалады.
Россия Кыргызстанга коронавируска даба болчу авифавир дарысын жиберет
Эске салсак, Россия коронавируска каршы вакцинаны кишилерге сыноону июнь айында баштаган. Анда вакцинанын суюк жана кургак деп бөлүнгөн эки түрү текшерилди. Суюк вакцина Бурденко атындагы аскердик госпиталда, экинчиси Сеченов университетинде сыналды.
Учурда дүйнө жүзү боюнча жүздөгөн лабораторияларда бул вируска каршы вакциналар жасалып жатат. Алардын 140ка жакын түрү клиникалык сыноого чейинки абалда кармалып турат. Кытай жана АКШлык окумуштуулар гана препаратты адамдарга сынап жатканын айтууда.
