БИШКЕК, 28-июн. — Sputnik. ИИМдин Баңгизатты мыйзамсыз айлантууга каршы күрөшүү кызматынын жетекчиси Олег Запольскийдин өпкөсү эки тарабынан тең пневмония болуп калган. Бул тууралуу Бишкек шаардык саламаттыкты сактоо башкармалыгынын жетекчиси Бактыгүл Исмаилова билдирди.
Анын айтымында, Запольский үйүнө дарыгер чакырып төрт-беш күн дарыланып жаткан. Абалы оорлошкондон кийин ооруканага алып келишкен.
“26-июнда анын (Олег Запольскийдин — ред.) достору чалып ооруканага жаткыруу керектигин айтышкан. Ошол эле күнү алып келгенде абалы оор болчу. Үйүндө аны кайсы дарыгер дарылап жатканын азырынча билбейм. Асма укол койгон экен. Ооруканага келгенде ал эки тараптуу пневмониянын оор түрү менен жабыркаганы аныкталды. Эртерээк кайрылса болмок экен, өтө кеч болуп калыптыр”, — деди Исмаилова.
Ошондой эле дарыгер Запольский ооруканада бир күн жаткандан кийин эле үзүлгөнүн айтты.
“Биринчи Улуттук госпиталда ачылган пневмония бөлүмүнө жаткырганбыз. Кычкылтек менен дем алып жаткан, эртеси эртең менен абалы жакшырып калган болчу. Кийинчерээк аны кыргыз-түрк ооруканасына алып баратканда абалы кескин начарлап кетип, жолдон №1 Шаардык клиникалык ооруканасына алып киришкен. Жандандыруу бөлүмүндө жатып көз жумду”, — деди Исмаилова.
Белгилей кетсек, Баңгизатка каршы күрөшүү кызматынын жетекчиси Олег Запольский кечээ, 27-июнда, кечке жуук каза болгону кабарланган.
Белгилүү кинорежиссёр Бакыт Карагулов көз жумду
Олег Запольский 1981-жылы Бишкекте төрөлгөн. 2003-жылы Кыргыз-Россия славян университетинин юридика факультетин аяктап, кийинки жылдан тарта эле Баңгизатты көзөмөлдөө боюнча агенттикте иштей баштаган. Былтыр январдан баштап Баңгизатты мыйзамсыз айлантууга каршы күрөшүү кызматынын жетекчиси болуп дайындалган.
Маркумдун ата-энеси "Дело №..." гезитинин негиздөөчүлөрү Виктор Запольский менен Светлана Красильникова эле.
