БИШКЕК, 22-июн. — Sputnik. Коомдук телерадиокорпорациясынын бир нече кызматкери коронавирус жуктуруп алды деп шектелүүдө. Бул тууралуу Sputnik агенттигинин кабарчысына телеканалдын жетекчиси Жайнак Үсөн уулу билдирди.
"Коронавируска шектенүү бар. Кечээ кызматкерлерибиз ПЦР-тест тапшырышты. Телерадиокорпорациянын ишине бул эч кандай таасир этпейт. Кырдаалды башынан эле эске алып, бир топ кызматкерлерди аралыктан иштөөгө жөнөткөнбүз", — деди Үсөн уулу.
Кыргызстанда акыркы бир суткада 205 кишиден коронавирус табылып, жалпы саны 3356га жетти. Анын ичинен 2021и айыгып, 40 киши каза тапты.
