БИШКЕК, 20-июн. — Sputnik. Бүгүн Москвадан Ошко 325 кыргызстандык чартердик каттам менен алып келинди. Бул тууралуу Тышкы иштер министрлиги билдирди.
Маалыматка караганда, аталган учак менен келүүгө жарандар бир нече критерийлер менен атайын арыздын негизинде кабыл алынган. Россиядагы элчиликте диаспора, дарыгерлер жана дипөкүлчүлүктүн кызматкерлеринен түзүлгөн комиссия тизмени бекиткен. Ал тизмеге кош бойлуу аялдар, баласы эки жашка чыга элек энелер жана ден соолугуна байланыштуу мекенине келүүгө мажбур болгон адамдар киргени айтылат.
Азыркы тапта келген мекендештердин баары обсервацияга алынып, медициналык кароодон өтүп жатат.
Тышкы иштер министрлиги чет өлкөдөгү жарандарды мекенге алып келүү иштери мындан ары дагы уланарын белгиледи.
