БИШКЕК, 13-июн. — Sputnik. UFC уюмунун оор салмактагы жана жарым оор салмактагы мурдагы чемпиону Даниэль Кормье мыкты мушкер аялдардын рейтинги анча калыс түзүлгөн эместигин айтып чыкты. Бул тууралуу MMA News порталы жазды.
Марттагы рейтингде Валентина Шевченко Кытайдан чыккан чемпион кыз Вэйли Чжандан бир сапка ылдый туруп калган. Чжан UFC 248 турниринде польшалык Иоанна Енджейчикти калыстардын чечими менен жеңип, алгачкы ирет бел курун коргоп калган. Ал арада спорт сүйүүчүлөрү үч ирет чемпиондук наамын алдырбаган кыргызстандык мушкер кантип бир сапка ылдый түшүп, ордуна кытайлык спортчу туруп калганына түшүнбөй калышкан.
"Мен Вэйли Чжанды сыйлайм, бирок ал азыр спортто Шевченкодон өйдө турбашы керек. Мушкер кыз рейтингдеги экинчи номердин ээси", — деген Кормье.
Анын айтымында, учурда Валентина мыктыларды аныктаган тизмеде Нуньестен кийин болушу шарт.
Буга чейин Даниэль Кормье бразилиялык Аманда Нуньести жеңил салмактагы чемпион Валентина Шевченко гана ута алышы мүмкүндүгүн айткан.
Кормье — ММА спортундагы легендарлуу адамдардын бири.
