БИШКЕК, 19-май — Sputnik. Нарын шаарынын жетекчилигинен коронавирус аныкталгандыктан, мэрия имараты 72 саатка жабылды. Бул тууралуу саламаттык сактоо министринин орун басары Мадамин Каратаев брифинг учурунда билдирди.
"Жетекчиликтен вирус чыгып калганына байланыштуу имарат кечээ 72 саатка жабылды. Ал жерде Нарын райондук администрациясы да бар экен. Андыктан текшерүү иштери жүрүп жатат. Таза чыккандар аралыктан иштеп турушу керек", — деди Каратаев.
Учурда мэрия имаратында дезинфекциялык иштер жүрүп жатканы кошумчаланды.
Облустук штабдан Sputnik редакциясына билдиришкендей, вирус жуктуруп алган адам шаар мэри эмес, жетекчилик орундагы башка кызматкер.
Эске салсак, Нарын облусу учурда эпидемиологиялык абал эң курч аймактардын бири. Бүгүнкү күндө облус боюнча вирус жуктургандардын саны 194кө жетти.
Коронавирустун кесепети
11-майдан тарта айрым аймактардагы өзгөчө абал режими алынып, ал эми өлкө боюнча киргизилген өзгөчө кырдаалдын мөөнөтү узартылды. Бишкек, Ош шаарларында, Ат-Башы районунда жана Чаткал районунун Каныш-Кыя айыл аймагында карантин жарыяланды. Бул жергиликтүү бийликке кырдаалга жараша чектөөлөрдү киргизүүгө укук берет.
Ушу тапта өлкө аймагында абал кандай болуп жатканын Sputnik жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
