БИШКЕК, 16-май — Sputnik. Тажикстандын Саламаттык сактоо жана калкты социалдык жактан колдоо министрлигинин расмий маалыматы боюнча, өлкөдө коронавирус жуктурган адамдардын саны 1118ге жетти. Бул туурасында Sputnik Тажикстан агенттиги жазды.
Мындай статистика 15-майда кечинде жарыяланган. Ага ылайык, соңку бир сутканын аралыгында эле 211 тажикстандык COVID-19 жуктурганы аныкталган.
Оорунун кесепетинен каза болгон кишилердин да саны өсүп, 33 адамга жеткени айтылат.
Ошондой эле азыркы тапта коңшу өлкөдө оору жугузушу мүмкүн деген шек менен 4 297 адам карантинге алынып, дарыгерлердин көзөмөлүндө болууда.
Белгилей кетсек, Тажикстанда коронавирус жуктургандар тууралуу расмий түрдө 30-апрелде Дүйнөлүк саламаттыкты сактоо уюмунун адистери келеринин алдында айтылган. Алар анализ жүргүзүп, өлкөдө карантиндик чараларды күчөтүп, оор кырдаалга даяр турушун эскерткен.
Кыргызстанда 16-майга карата коронавируска кабылгандардын саны 1117ге жетип, анын ичинен 783ү айыгып чыкты. Тилекке каршы, 14 бейтап каза болуп калды.
