БИШКЕК, 9-май — Sputnik. Россиянын Оренбург шаарынан чыгып жолдо калган кыргызстандыктар Sputnik маалымат агенттигине кайрылып, өлкөгө жете албай жатканын айтышты.
Мекендештердин видеосу Sputnik Кыргызстан агенттигинин Instagram баракчасына жарыяланды.
Посмотреть эту публикацию в Instagram
Анда көрүнүп тургандай, жолдо калган мекендештер каралбай калган көпүрөнүн алдын баш паанектеп калышкан.
"Каралбай калган көпүрөнү балдар өздөрү тазалап, алдына чөп төшөп, бир жагын тал менен тосуп коюшту. Таштандыдан линолеум таап келип, шамал кирбесин деп бир жагын тосуп, ошол жакта түнөп жатышат", — деп жазган видео жөнөткөн адам.
Видеодон аялдардын да ыйлап отурганын көрүүгө болот.
Анда айрымдары "Оренбургдун губернатору биздин бийлик кол койсо эле жеткирип беребиз деп айтып жатат" десе, кээ бири "маселебизди чечсе, өзүбүздүн жол киреге эле кетмекпиз" деп жашып жатышат.
"Элчиликтер диаспора башчылары менен иштеп жатат. Казакстан транзит коридорун бир жолу эле ачып, саналуу эле жарандарыбызды өткөргөн. Азыр бул боюнча иш уланып жатат", — деп айтылат ТИМдин маалыматында.
КРдин Россиядагы элчилигинин маалымат катчысы Гүлбарчын Байымбетованын айтымында, жолдо калган жарандар элчиликтин айтканын укпай, өз эрки менен кетип калгандар.
"29-мартта кетпей калган жарандарды хостелге жайгаштырганбыз. Ошол мекендештер чыдабай автобусту өздөрү жалдап кетип калышкан. Аларга коомдук уюмдар, элчилик "жолго чыкпагыла, жетпей каласыңар" деп эскертип айтканбыз. Азыр булардын маселесин чечүү боюнча Оренбург облусунун губернатору менен сүйлөшүү жүрүп жатат. Кандайдыр бир чара көрүп, аларды бир жерге жайгаштырабыз", — деди Байымбетова.
Ал жолдо калган кыргызстандыктарды Оренбургга кайтаруу же Кыргызстанга жеткирүү боюнча маселе чечилип жатканын, бирок Казакстандын чек арасы жабык болгондуктан, аларды мекенге жеткирүүдө кыйынчылык жаралып калышы мүмкүн экенин айтты.
Эске салсак, Казакстан Кыргызстанга бир жолку өтүүгө гана уруксат берген. 7-майда Оренбург облусунун Соль-Илецк районунда кармалып турган кыргызстандыктар Бишкекке алып келинген.
