БИШКЕК, 7-май — Sputnik. Эне жана баланы коргоо улуттук борборундагы бейтап, медиктерден COVID 4-майда аныкталган. Бул тууралуу Sputnik Кыргызстан агенттигине аталган борбордун жетекчиси Камчыбек Узакбаев билдирди.
Эске салсак, буга чейин аталган борбордун гематология бөлүмүндө жаткан эки бейтап баладан, үч энеден жана эки медиктен коронавирус аныкталгандыгы белгилүү болгон.
Узакбаевдин айтымында, марттын аягында Эне жана баланы коргоо улуттук борборунун гематология бөлүмүнө Жалал-Абад облусунун Тогуз-Торо районунан бейтап түшкөн. Ал жаш бала болгондуктан, жанында апасы карап жаткан. Баланын дарылануусу 17-апрелде аяктап, ооруканадан чыгарылган.
"Ал келин баласы менен бир жумадай жолдо жүрүп Жалал-Абадга 24-апрелде барган окшойт. Анализи 24-апрелде алынып, апасынан коронавирус табылыптыр. Бизге андан коронавирус табылгандыгы тууралуу маалымат 30-апрелде келген. Ошол күнү эле дароо бөлүмдө иштеген медиктерден, бейтаптардан жана аларды карап жаткан ата-энелерден анализ алдык. Жыйынтыгы төрт күндөн кийин чыкты. Тагыраагы, 3-майда бир кишиден коронавирус табылса, 4-майда калган алты кишиде коронавирус бар экени аныкталды", — деди Узакбаев.
Ал эми бөлүмдөгү калган 20 медкызматкердин, 13 бала жана жети эненин анализдери таза чыкканы маалым болду. Коронавирус аныкталган бейтаптардын бардыгы жугуштуу илдеттер ооруканасына которулган. Бул бөлүмдө жаткан 13 бала тең оор абалда болгондуктан, дезинфекция иштери жүрүп, балдар ооруканада эле калышкан. Ал эми 20 медкызматкерге биринчи жана экинчи кабатта обсервация уюштурулган.
Ушу тапта Кыргызстанда абал кандай болуп жатканын Sputnik агенттиги жүргүзүп жаткан тексттик баяндамадан билүүгө болот.
Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
