БИШКЕК, 7-май — Sputnik. Бишкектен барган ветеринардык дарыгерлер Нарында кармалган ак илбирсти текшерип, абалына ортодон төмөн деген баа берди. Бул тууралуу Айлана-чөйрөнү коргоо жана токой чарба агенттигинин маалымат кызматы билдирди.
Өзгөчө корголгон жаратылыш аймактары жана биологиялык ар түрдүүлүктү сактоо департаментинин кызматкерлери жана ветеринарлар жырткычты толугу менен кароодон өткөргөн.
“Текшерүүнүн жыйынтыгында ак илбирстин оң көзү көрбөй, тиштери түшүп калганы аныкталды. Ошондой эле сол бутунун манжалары чыгып кеткен, оозу, мурдунда жарааты болгон. Ветеринарлар аны калыбына келтирүү үчүн дары-дармектерди жазып беришти. Учурда жырткычтын абалы жакшы, тамак жеп калды. Дайыма ветеринардык врачтардын көзөмөлүндө болот”, — деп айтылат маалыматта.
Эскерте кетсек, Нарын районунун Эмгек-Талаа айылынын тургундары торпокко тиш салган ак илбирсти 3-майда кармап бийлик органдарына кабарлашкан. Андан соң жырткыч Ысык-Көл облусундагы NABU реабилитациялоо борборуна жеткирилген.
